ლარის კურსი მნიშვნელოვანია, როგორც საქართველოს მოსახლეობისთვის, ასევე ბიზნესისთვის. ეროვნული ბანკი საქართველოს მთავრობასთან ერთად კოორდინაციაში მუშაობს, რომ თავიდან იქნას აცილებული ლარის მკვეთრი მერყეობა, – ამის შესახებ საქართველოს ფინანსთა მინისტრმა, ლაშა ხუციშვილმა განაცხადა.
მინისტრის განცხადებით, ბოლო პერიოდში ლარის კურსის სტაბილიზაცია შეინიშნება.
„ბოლო მოკლევადიან პერიოდში შეინიშნება აღნიშნული სტაბილურობა, თუმცა უნდა აღვნიშნოთ ისიც, რომ საკმაოდ რთულ სიტუაციაში არის ქვეყანა პანდემიიდან გამომდინარე. შესაბამისად, ერთ-ერთი მიმართულება არის ის, რომ მაქსიმალურად სწრაფად უნდა მოხდეს ვაქცინაციის განხორციელება ქვეყანაში და ასევე მაქსიმალურად უნდა შევძლოთ ტურიზმის გარკვეული პროცენტული ნაწილის აღდგენა. მნიშვნელოვანია, რომ წელს, წლის ბოლოს, ტურიზმის აღდგენა განხორციელდეს. თუმცა, გარდა ამისა, არის რეგიონში გამოწვევები. იცით, რომ რეგიონში ფაქტობრივად, ძალიან დაძაბული სიტუაციაა, საუბარი მაქვს ჩვენს სამეზობლოზე. გარდა ამისა, თურქეთის შემთხვევაში, ერთ დღეში გაუფასურდა 15-16 პროცენტით. შესაბამისად, რეგიონის ეს სიტუაცია გამორიცხულია, რომ საქართველოზე რაღაც დოზით არ აისახოს. საქართველოს ეროვნული ბანკი ძალიან აქტიურად მუშაობს, რომ მოხდეს ფასების სტაბილიზაცია, ინფლაცია ახლოს იყოს ტარგეტირებულ ნიშნულთან. მოლოდინი გვაქვს, რომ ვაქცინაციის პროცესი დაჩქარდება. ვფიქრობთ, რომ საკმაოდ პოზიტიური მოლოდინები უნდა ჰქონდეს ქვეყანას“, – განაცხადა ხუციშვილმა.