„ლელოს” ლიდერი მამუკა ხაზარაძე რუსთავის პენიტენციურ დაწესებულებაში „ნაციონალური მოძრაობის” თავმჯდომარეს, ნიკა მელიას ხვდება.
როგორც ხაზარაძემ ჟურნალისტებს პენიტენციურ დაწესებულებაში შესვლამდე განუცხადა, უმნიშვნელოვანესია, რომ შარლ მიშელის დოკუმენტი შესრულდეს და ამისთვის „ლელო“ და ყველა ხელისმომწერი ოპოზიციური პარტია ყველაფერს აკეთებს.
„ეს არის ქვეყნის გადატვირთვის დაწყების ერთადერთი გზა, რამეთუ ის 5 პუნქტი ითვალისწინებს მნიშვნელოვან რეფორმებს. ერთი პოლიტპატიმარი გათავისუფლდა. დღეს ვხვდები ნიკა მელიას და მინდა ორ თემაზე ვესაუბრო. პირველი ეხება იმას, რომ უნიკალური შანსია ევროკავშირის ფონდის გამოყენება. ეს არ არის რამის აღიარება, იმიტომ რომ ევროკავშირი და მისი ფონდები დამნაშავეებისთვის გირაოს არ იხდიან. ვცადეთ თავდებობის ალტერნატივა, მაგრამ „ქართულმა ოცნებამ” ეს არ მიიღო. ამიტომ ერთადერთი ვარიანტია დარჩენილი, რომ ნიკა მელია გირაოთი გამოვიდეს. მეორე საკითხია, რომ „ლელო” შევიდა ინიციატივით შეიქმნას საგამოძიებო საპარლამენტო კომისია, რომელიც სრულად გამოიძიებს 20 ივნისის ფაქტებს და მხოლოდ ამის შემდეგ არის შესაძლებელი ამნისტიაზე საუბარი და მისი განხორციელება. მნიშვნელოვანია, რომ საზოგადოებამ იცოდეს, ვინ რა დააშავა. ამის შემდეგ უნდა მოხდეს შერიგება და „გადატვირთვა“ და იმ რეფორმების გატარება, რომელიც დოკუმენტის პუნქტებში გვიწერია. დაველაპარაკები, პირველ რიგში, ადამიანურად მინდა, რომ ნიკა მელია იყოს გარეთ და იბრძოლოს გარეთ”,- განაცხადა ხაზარაძემ.