ვინც ითხოვს ვეტოს, იმათ დროს კიდევ უფრო მძაფრი იყო ეს კანონი და ის ახალგაზრდა როგორ უნდა დაისაჯოს 500 ლარით, რომელმაც გაგინა, აგრესია გამოხატა და თავზე ნაგავი დაგაყარა, – ამის შესახებ „ევროპელი სოციალისტების“ წევრმა, დავით ზილფიმიანმა განაცხადა.
როგორც ზილფიმიანმა აღნიშნა, ადმინისტრაციულ სამართალდარღვევათა კოდექსში ორი არსებითი ცვლილება შევიდა, ერთი ეხებოდა წინასწარი დაკავების ვადას და მეორე წვრილმან ხულიგნობას.
„ჩვენი მხარდაჭერა გამოიხატებოდა იმაში, რომ მოძველებული დეფინიცია – წვრილმანი ხულიგნობა უნდა შეიცვალოს. მაგალითიც მივიყვანე. როცა ეს კანონი იქმნებოდა 70-80-იან წლებში, წარმოუდგენელი იყო ახალგაზრდა ადამიანს შეურაცხყოფა მიეყენებინა, ეგინებინა, თავზე ნაგავი დაეყარა ადამიანისთვის. ამას ჰქვია წვრილმანი ხულიგნობა და წვრილმანი ხულიგნობაა ისიც, რომ ღამის 03:00 საათზე შეყვარებულმა ბალადა უმღეროს შეყვარებულს. ესეც წვრილმანი ხულიგნობაა. ერთნაირად როგორ შეიძლება, დაისაჯოს? ეს არის ერთნაირად დასჯა. შეყვარებულის შემთხვევაში ეს საერთოდ ხულიგნობაშიც კი არ უნდა ჩაითვალოს. მეორე შემთხვევაში კი ისიც ცოტაა, რაც დღეს გვაქვს. ჩამონათვალი, დეფინიცია წვრილმანი ხულიგნობისა, დროა, უკვე გავმიჯნოთ და ყველაფერს მივცეთ თავისი სახელი. ამიტომ იყო ჩემი გამოსვლა მძაფრი და დღესაც ამ აზრზე ვარ. წვრილმან ხულიგნობაში შედის ზოგიერთი ისეთი ქმედება, რომელიც დაუშვებელია. ის 500 ლარით არ უნდა შემოიფარგლოს. როგორ შეიძლება, თუ სხვის მეუღლეს აგინებ, არაფერი არ იყოს და თუ საკუთარ მეუღლეს აგინებ, მაშინ ციხეში წახვიდე? როგორ შეიძლება, აგრესია მიიტანო, ვიღაცას აგინო ქუჩაში და შემოიფარგლო 100 და 500 ლარით“, – განაცხადა ზილფიმიანმა.
მისივე თქმით, თანამედროვე ეპოქაში წარმოიქმნა ისეთი ქმედებები, რომლებიც იდენტიფიცირებულია როგორც წვრილმანი ხულიგნობა, მაგრამ სინამდვილეში ის გაცილებით უფრო მძაფრი დანაშაულია, ვიდრე აქამდე შეიძლებოდა, ყოფილიყო.
„სასწრაფოდ უნდა შეიცვალოს ცნება წვრილმანი ხულიგნობის, დეფინიცია მოხდეს. ის, რაც მსუბუქია, საერთოდ არ უნდა ისჯებოდეს და დარჩეს ის ასი ლარი. მე არ ვარ მომხრე რაიმე სახის სასჯელზე, დიდ სასჯელზე, მაგრამ საჭიროა გამიჯვნა, შემდეგ უკვე ადვილი იქნება, მოვახდინოთ, რაზე რა სასჯელი იქნება. ალბათ კვლავ გაგრძელდება აქციები და შიშია, რომ დიდხანს არ მოხდეს აქტივისტების დაკავება. ვფიქრობ, ეს არის მიზეზი, თორემ რატომ არ გამოდიოდნენ, რატომ არ აპროტესტებდნენ ადეიშვილის დროს შექმნილ კანონს, რომლის მიხედვითაც, სამი თვე იყო თავისუფლების აღკვეთა. ორმაგი სტანდარტების მომხრე არ ვარ. გულღიად, მომხრე ვარ, რომ ყველაფერზე იყოს მინიმალური სასჯელი, ოღონდ ქმედებას გააჩნია. ამიტომ, სისულელეა ვეტოს რას ვადებთ? ვინც თხოულობს ვეტოს, იმათ დროს კიდევ უფრო მძაფრი იყო ეს კანონი და ის ახალგაზრდა 500 ლარით როგორ უნდა დაისაჯოს, რომელმაც გაგინა, აგრესია გამოხატა და თავზე ნაგავი დაგაყარა“, – განაცხადა ზილფიმიანმა.