The Times of Israel დიპლომატიურ წყაროზე დაყრდნობით ანონიმურად წერს, რომ ისრაელსა და ტერორისტულ დაჯგუფებასთან, ჰამასს, შორის შეთანხმება, შესაძლოა, რამდენიმე დღეში შედგეს.
წყაროს თქმით, შუამავლებს ფრთხილი ოპტიმიზმი აქვთ, რომ ისრაელის თავდაცვის ძალებსა და ჰამასის ტერორისტულ ჯგუფს შორის ბრძოლა რამდენიმე დღეში შეწყდება.
დიპლომატის თქმით, მას შემდეგ, რაც 13 და 14 მაისს ისრაელმა ღაზის სექტორზე მასშტაბური იერიში მიიტანა, მომლაპარაკებლებს სჯერათ, რომ ისრაელი მალე შეწყვეტს საბრძოლო მოქმედებებს.
პარალელურად, 14 მაისს თელ-ავივში მოლაპარაკებების გასამართად ჩავიდა აშშ-ს სახელმწიფო დეპარტამენტში ახლო აღმოსავლეთის საქმეთა ბიუროში ისრაელისა და პალესტინის საქმეებში სახელმწიფო მდივნის თანაშემწის მოადგილე, ჰადი ამრი.
“დღეს ამრი თელ-ავივში ჩავიდა, რათა განამტკიცოს მდგრადი სიმშვიდისკენ მუშაობა და ისრაელის თავდაცვის უფლების აღიარება. ისრაელელები და პალესტინელები იმსახურებენ თავისუფლების, უსაფრთხოების, ღირსების და კეთილდღეობის თანაბარ ზომებს”. – ვკითხულობთ ისრაელში აშშ-ს საელჩოს განცხადებაში.
ის რამდენიმე საათში ჩავიდა ისრაელში მას შემდეგ, რაც 14 მაისს ისრაელის პრემიერმინისტრმა, ბენიამინ ნეთანიაჰუმ განაცხადა, რომ ბრძოლა არ დასრულებულა.
დიპლომატის თქმით, 15 მაისს გაერო-ს უშიშროების საბჭოში გაიმართება საგანგებო შეხვედრა ისრაელსა და ღაზის სექტორს შორის არსებულ სიტუაციაზე. დიპლომატის თქმით, წევრი ქვეყნები მხარეებს ცეცხლის შეწყვეტისკენ ერთხმად მოუწოდებს.
13 მაისს ჯო ბაიდენმა თქვა, რომ ის ნეთანიაჰუს ესაუბრა საბრძოლო მოქმედებების ჩაცხრომაზე, თუმცა მას ასევე მხარი დაუჭირა და თქვა, რომ ისრაელის მხრიდან “მნიშვნელოვანი ზედმეტი რეაგირება არ ყოფილა”.
ჰამასის პოლიტიკურმა ლიდერმა, ხალედ მაშაალმა, თურქეთის სიახლეების სააგენტოსთან თქვა, რომ ღაზის დაჯგუფება მზადაა ცეცხლის შეწყვეტისთვის, თუმცა ისრაელისგან პასუხი არ მიუღიათ. ამავდროულად, ჰამასის კიდევ ერთმა წარმომადგენელმა არაბულ სიახლეების სააგენტოსთან al-Meyadeen-თან თქვა, რომ მოლაპარაკებებში პროგრესი არ არის.
ეგვიპტის სადაზვერვო სამსახურის ოფიციალურმა პირმა Associated Press-ს უთხრა, რომ ისრაელმა უარი განაცხადა ეგვიპტის შემოთავაზებაზე, რომ ჰამასთან და ღაზის სხვა დაჯგუფებებთან ერთ-წლიანი ზავი დაედო. მისი თქმით, ჰამასი შემოთავაზებას თანხმდებოდა. მისივე თქმით, ისრაელს სამშვიდობო შეთანხმების გადადება სურდა იქამდე, სანამ ჰამასის და ისლამისტური ჯიჰადის დაჯგუფების მეტ შესაძლებლობებს არ გაანადგურებდნენ.
კიდევ ერთმა ოფიციალურმა პირმა The Times of Israel-თან თქვა, რომ ეგვიპტე მოლაპარაკებებს აწარმოებს ჰამასთან, კატართან, აშშ-სთან და სხვა ქვეყნებთან, თუმცა არა პირისპირ ისრაელთან.
დაძაბულობა მოჰყვა იერუსალიმში, ალ-აკსას მეჩეთთან პალესტინელებისა და ისრაელის პოლიციის დაპირისპირებას. გასულ დღეებში გავრცელდა ინფორმაცია იერუსალიმის შაიხ ჯარის რაიონიდან პალესტინელთა შესაძლო გასახლების შესახებ, რასაც ამ უკანასკნელთა პროტესტი მოჰყვა. ასევე, 10 მაისს ისრაელი იერუსალიმის დღეს აღნიშნავს, დღეს, როდესაც 1967 წლის არაბეთ-ისრაელის ომში ქალაქის რამდენიმე მონაკვეთი აიღეს.
ღაზის სექტორი პალესტინელთა ანკლავია, რომელსაც დაჯგუფება ჰამასი მართავს.