“ ირმა ინაშვილის განცხადებები ღიმილისმომგვრელია, მას კონკრეტული მტკიცებულებები თუ აქვს, შეუძლია, საზოგადოებას გააცნოს”

საპარლამენტო უმრავლესობის წევრის, გივი მიქანაძის შეფასებით, „პატრიოტთა ალიანსის“ ლიდერის, ირმა ინაშვილის განცხადებები ღიმილისმომგვრელი და უსაფუძვლოა.

„ირმა ინაშვილის ბრალდებები სრულიად უსაფუძვლოა. ჩვენ ვხედავთ, რომ ოპოზიცია, მათ შორის „ევროპელი სოციალისტები“ ძალიან აქტიურად არიან ჩართული საპარლამენტო ცხოვრებაში. ისინი ჩართული არიან არა მხოლოდ მიმდინარე კანონშემოქმედებით და საპარლამენტო კონტროლის ფუნქციებში, არამედ „ევროპელი სოციალისტები“ შემოვიდნენ საგამოძიებო კომისიაში, რომელმაც უნდა შეისწავლოს 31 ოქტომბრის არჩევნებთან დაკავშირებული საკითხები. მათი ჩართულობა ძალიან მნიშვნელოვანია იმ პროცესებისთვის, რომელიც საბოლოო ჯამში, საშუალებას მოგვცემს, კონკრეტულ კითხვებზე კონკრეტული პასუხები მივიღოთ. ფაქტია ერთია, რომ მთელმა საერთაშორისო საზოგადოებამ და მათ შორის პარლამენტში შემოსულმა ოპოზიციამაც აღიარა ამ არჩევნების ლეგიტიმურობა. ეს საკითხი კითხვის ნიშნის ქვეშ არავის არ დაუყენებია, გარდა რადიკალური ოპოზიციისა. პარლამენტი სრულფასოვნად ფუნქციონირებს და ძალიან ადეკვატურად ასახული ქართველი ამომრჩევლის მიერ გაკეთებული თავისუფალი ნება საქართველოს პარლამენტში. თუმცა ზოგიერთი რადიკალური და დესტრუქციული ძალა ამას დღემდე არ ეგუება იმიტომ, რომ მათ სხვა მიზანი და ვიწროპარტიული ინტერესები ამოძრავებთ. ქალბატონ ირმას რაღაც კონკრეტული მტკიცებულებები თუ აქვს ამასთან დაკავშირებით, შეუძლია, საზოგადოებას გააცნოს“, – განაცხადა მიქანაძემ.