პარტია „ხალხის ძალის“ წევრი თამარ ჩიბურდანიძე საქართველოში უზბეკეთის პრეზიდენტის ოფიციალურ ვიზიტს სოციალურ ქსელში ეხმიანება და აღნიშნავს, რომ შუა აზიის სახელმწიფოებთან საქართველოს მჭიდრო პარტნიორობა ქვეყნის საგარეო პოლიტიკური და ეკონომიკური ინტერესებიდან გამომდინარე განსაკუთრებულ მნიშვნელობას იძენს.
ჩიბურდანიძის შეფასებით, შუა აზია დღეს დამოუკიდებელ გეოპოლიტიკურ ცენტრად ყალიბდება, რასაც მისი სტრატეგიული მდებარეობა, ენერგორესურსები და ე.წ. შუა დერეფნის მზარდი მნიშვნელობა განაპირობებს.
„საქართველოში ოფიციალური ვიზიტით იმყოფება უზბეკეთის პრეზიდენტი. ჩვენი ხელისუფლების პოლიტიკური სტრატეგია, რომელიც შუა აზიის სახელმწიფოებთან მჭიდრო პარტნიორობის განვითარებას ითვალისწინებს, მისასალმებელია და მხოლოდ პოზიტიურ ჭრილში უნდა განვიხილოთ.
ახალ რეალობაში, სადაც მსოფლიოს როგორც ყოფილი, ისე ახალი ძლიერი სახელმწიფოები პირველობისთვის იბრძვიან, შუა აზია თანდათან სულ უფრო მნიშვნელოვან ადგილს იკავებს გლობალურ პოლიტიკაში. დღეს ის დამოუკიდებელ გეოპოლიტიკურ ცენტრად ყალიბდება.
ამის რამდენიმე მთავარი მიზეზი არსებობს: სტრატეგიული მდებარეობა – რეგიონი აკავშირებს ჩინეთს, რუსეთს, ირანს, ინდოეთს, ევროპასა და აზიას; ენერგორესურსები; ასევე, რეგიონზე გადის ე.წ. შუა დერეფანი, რომლის მნიშვნელობაც განსაკუთრებით გაიზარდა რუსეთ-უკრაინის ომის შემდეგ.
შუა აზიის ქვეყნების და მთლიანად რეგიონის დამოუკიდებლობის ზრდა მრავალვექტორულმა საგარეო პოლიტიკამ განაპირობა. ისინი ცდილობენ, არც ერთ დიდ სახელმწიფოზე არ იყვნენ დამოკიდებულნი. ერთდროულად თანამშრომლობენ სხვადასხვა პარტნიორთან, მაშინაც კი, როდესაც ამ პარტნიორებს ერთმანეთთან საუკეთესო ურთიერთობა არ აქვთ. ამით ის ერთგვარი მაგალითია ჩვენი რეგიონისთვის. სამხრეთ კავკასიამაც უნდა შეძლოს მრავალვექტორული საგარეო პოლიტიკის გატარებით რეგიონული დამოუკიდებლობის გაძლიერება და მნიშვნელოვან გეოპოლიტიკურ ცენტრად ჩამოყალიბება.
საქართველო უკვე აწარმოებს მრავალვექტორულ საგარეო პოლიტიკას, რაც ერთადერთი სწორი გზაა ქვეყნის თვითმყოფადობისა და ეკონომიკური განვითარებისთვის. ამ მხრივ განსაკუთრებით მნიშვნელოვანია სწორედ შუა აზიის სახელმწიფოებთან მჭიდრო კავშირი. ჩვენი ქვეყანა „შუა დერეფნის“ ნაწილია. ამ მარშრუტის განვითარებით გაიზრდება საქართველოში ტვირთბრუნვა, ინვესტიციები, სატვირთო და სარკინიგზო ინფრასტრუქტურის დატვირთვა და, რაც მთავარია, საქართველოს როლი, როგორც ევროპასა და აზიას შორის დამაკავშირებელი რგოლის.
მიუხედავად იმისა, რომ შუა აზიას კვლავ აქვს გარკვეული გამოწვევები, ის უკვე აღარ არის მხოლოდ „პერიფერიული რეგიონი“ მისი მრავალი უპირატესობის გამო: გეოგრაფიული მდებარეობა, ენერგორესურსები, სატრანსპორტო დერეფნები და მზარდი ეკონომიკური მნიშვნელობა. იგი XXI საუკუნის ერთ-ერთ ყველაზე მნიშვნელოვან გეოპოლიტიკურ სივრცედ ყალიბდება.
დღეს მსოფლიოს დიდი სახელმწიფოები ამ რეგიონთან მჭიდრო ეკონომიკური და პოლიტიკური ურთიერთობებისკენ მიისწრაფვიან. მისი როლი მომავალ წლებში კიდევ უფრო გაიზრდება და საქართველო იქნება ის ქვეყანა, რომელსაც ამ ახალ, ძლიერ და გავლენიან პოლიტიკურ ცენტრთან მჭიდრო სტრატეგიული პარტნიორობა ექნება,”- წერს თამარ ჩიბურდანიძე.