ჯო ბაიდენის ადმინისტრაცია „ჩრდილოეთის ნაკადი-2“-ის ოპერატორის, Nord Stream 2 AG-ის მიმართ სანქციებს არ გამოიყენებს. ინფორმაციას ამის შესახებ სააგენტო Bloomberg-ი ინფორმირებულ წყაროებზე დაყრდნობით ავრცელებს.
არსებული ინფორმაციით, აშშ-ის ადმინისტრაცია სანქციებს ფორმალურად დააწესებს, თუმცა სანქციების მოქმედებას დაუყოვნებნლივ შეაჩერებს.
როგორც წყაროები იუწყებიან, კონგრესისთვის გაგზავნილ მოხსენებაში სახელმწიფო დეპარტამენტმა განაცხადა, რომ Nord Stream 2 AG-ი სანქცირებულ საქმიანობას ეწევა აშშ-ს კანონმდებლობის შესაბამისად, თუმცა ბაიდენის ადმინისტრაციამ გადაწყვიტა, უარი ეთქვა სანქციებზე ეროვნული უსაფრთხოების მიზეზებიდან გამომდინარე.
თავის მხრივ სააგენტო Associated Press-ი იუწყება, რომ სახელმწიფო მდივანმა, ენტონი ბლინკენმა გერმანიის საგარეო საქმეთა მინისტრს, ჰაიკო მაასს განუცხადა, რომ სახელმწიფო დეპარტამენტის მოხსენებაში ჩამოთვლილია სანქციები მთელი რიგი პირების მიმართ, მაგრამ ასევეა მოცემული Nord Stream 2 AG-სა და მისი აღმასრულებელი დირექტორისთვის, მატიას ვარნიგისთვის სანქციების დაწესებაზე უარის თქმა.