უკრაინის პრეზიდენტმა, ვლადიმირ ზელენსკიმ მთავრობას ბელარუსთან საჰაერო მიმოსვლის შეწყვეტის გადაწყვეტილების მომზადება დაავალა.
„პრეზიდენტმა მთავრობას უკრაინასა და ბელარუსს შორის პირდაპირი საჰაერო მიმოსვლის შეწყვეტისა და უკრაინიდან და უკრაინაში ფრენებისთვის ბელარუსის საჰაერო სივრცის დახურვის გადაწყვეტილების მომზადება დაავალა“, – ნათქვამია უკრაინის პრეზიდენტის პრესსამსახურის განცხადებაში.
23 მაისს Ryanair-ის თვითმფრინავი, რომელიც ათენიდან ვილნიუსში რეისს ასრულებდა, ბორტზე ბომბის არსებობის შესახებ შეტყობინების გამო მინსკში დაეშვა. მოგვიანებით გაირკვა, რომ ეს ინფორმაცია არ დადასტურდა. ამასთან, რეისის ერთ-ერთი მგზავრი, ოპოზიციურად განწყობილი ბელარუსი ჟურნალისტი, რომან პროტასევიჩი დააკავეს.
ბელარუსში რომან პროტასევიჩს მინსკში მასობრივი არეულობის მოწყობასა და ხელისუფლებისა და მილიციის წარმომადგენლების მიმართ „სოციალური შუღლის გაღვივებაში“ ადანაშაულებენ.