„გახარიას ხელით გადმომეცა“ არის სულ სხვა და „თავად გახარიამ გადმომცა“ არის სხვა, იმიტომ რომ ხელით გადაცემის დროს უნდა ამტკიცო, რომ ნამდვილად მისგან მისგან იყო ის წერილი მიღებული. ასეა იურისპრუდენციაში. და როდესაც პირადად მიიღე და ამის მტკიცება გიწევს, ეს სულ სხვა მოცემულობაა, – ამის შესახებ გურამ მაჭარაშვილმა „ლელოს“ ლიდერების მხრიდან მუქარის წერილის მიღების შესახებ გაჟღერებული ბრალდების კომენტირებისას განაცხადა. საპროცედურო საკითხთა და წესების კომიტეტის თავმჯდომარის პირველი მოადგილის განცხადებით, ყოფილ პრემიერ-მინისტრს ბევრ კითხვაზე მოუწევს პასუხის გაცემა.
„არ არის კარგი, როდესაც თავის დროზე არ ამბობ იმ ფაქტს, რომელსაც გინდა შეეწინააღმდეგო. ეს, რა თქმა უნდა, თავად ბატონი გახარიას და ბატონი ჯაფარიძის გადასაწყვეტია, რას და როგორ გაარკვევენ ახლა უკვე ოპოზიციონერი კოლეგები, მაგრამ ის, რომ გახარიას მოუწევს ძალიან ბევრ კითხვაზე პასუხის გაცემა, ბუნებრივია. აქედან გამომდინარე, ვფიქრობთ, რომ ის ბუნდოვანება, რომელიც მან თავად შემოიტანა პოლიტიკაში ხელმეორედ შემოსვლით, გვიჩენს ძალიან ბევრ კითხვას და ეჭვებს“, – განაცხადა მაჭარაშვილმა.
„თიბისი ბანკის“ დამფუძნებელმა მამუკა ხაზარაძემ მუქარის წერილის შესახებ პირველად 2019 წლის 4 მარტს ისაუბრა. მისი თქმით, შინაგან საქმეთა მაშინდელი მინისტრის, გიორგი გახარიასგან წერილი მან საპრეზიდენტო არჩევნების მეორე ტურის წინ მიიღო.