ოპოზიციური პარტიები, ალბათ ერთმანეთში გაერკვევიან, საერთოდ რა წერილზეა საუბარი და ვინ ვის რა გადასცა, – ამის შესახებ უმრავლესობის წევრმა, „დავით მათიკაშვილმა განაცხადა.
იგი ე.წ. მუქარის წერილთან დაკავშირებით ბადრი ჯაფარიძის გუშინდელ განცხადებას გამოეხმაურა.
„თავიდან რაღაც მითიური წერილის წარმომავლობის შესახებ ინფორმაციას არ ამჟღავნებდნენ. შემდგომ იყო ნათქვამი ჯაფარიძის მიერ, რომ გახარიას ხელით მისცეს მას ეს დოკუმენტი. ახლა, გახარიას ოპოზიციაში გადაბრძანების შემდეგ, ამბობენ, თითქოს თვითონ, უშუალოდ გახარიამ გადასცა. მოკლედ, ოპოზიციური პარტიები, ალბათ ერთმანეთში გაერკვევიან, საერთოდ რა წერილზეა საუბარი და ვინ ვის რა გადასცა, მაგრამ ბოლო დროს საზოგადოებაში დაგროვდა გარკვეული პასუხგაუცემელი კითხვები გიორგი გახარიასა და მისი ახლადშექმნილი პარტიის მიმართ, რაზეც საზოგადოება პასუხებს ითხოვს“, – განაცხადა მათიკაშვილმა.
„თიბისი ბანკის“ დამფუძნებელმა მამუკა ხაზარაძემ მუქარის წერილის შესახებ პირველად 2019 წლის 4 მარტს ისაუბრა. მისი თქმით, შინაგან საქმეთა მაშინდელი მინისტრის, გიორგი გახარიასგან წერილი მან საპრეზიდენტო არჩევნების მეორე ტურის წინ მიიღო.