დღეიდან ძალაში შევიდა რუსეთის მთავრობის განკარგულება, რომლის თანახმადაც 5 ივნისიდან 31 აგვისტოს ჩათვლით რუსეთიდან წიწიბურას მარცვლეულის ექსპორტი აიკრძალა. ამის შესახებ რუსული მედია წერს.
წიწიბურასა და წიწიბურას ბურღულის ექსპორტის დროებითი შეზღუდვის ინიციატივით რუსეთის სოფლის მეურნეობის სამინისტრო გამოვიდა. მიზეზად კი შიდა ბაზარზე წიწიბურასა და წიწიბურას ბურღულეულის საჭირო მოცულობების შენარჩუნება და ფასების მკვეთრი რყევების თავიდან აცილება დასახელდა.
ამასთან რუსეთის ფედერაციის სოფლის მეურნეობის სამინისტრო აცხადებს, რომ რიგ ქვეყნებში პანდემიის დროს რუსეთიდან წიწიბურას ექსპორტი გაიზარდა. რუსეთის ხელისუფლება მიიჩნევს, რომ პროდუქტით ადგილობრივი ბაზრის უზრუნველყოფა უნდა მოხდეს.
2020 წელს წიწიბურას მოსავალმა რუსეთში 893 ათასი ტონა შეადგინა, რაც 2019 წლის მაჩვენებელზე 13,6%-ით მეტია. საქართველოში წიწიბურას 90%-ზე მეტი რუსეთიდან შემოდის.