ალბათ, ეს უფრო თვალის ჩაპაჭუნების პოლიტიკის გაგრძელებაა. თვალს უპაჭუნებენ ჩვენს რეალურ მომხრეებს, ატყუებენ და ეუბნებიან, რომ ბიძინა ივანიშვილის მიერ „ქართული ოცნების“ ალტერნატივად ჩვენ ვართ მოაზრებული. მოდით, „გადმოლაგდით“ ჩვენთან, – ამის შესახებ კულტურის მინისტრმა, თეა წულუკიანმა „ქრონიკაში“ ჩართვისას გიორგი გახარიას პარტიაზე საუბრისას განაცხადა.
მისი თქმით, გახარიას პარტიის წარმომადგენლები რომ აღნიშნულს ჩადიან, ამის შესახებ წულუკიანმა გურიაში, სამეგრელოში, შიდა ქართლსა თუ სხვა რეგიონებში „ქართული ოცნების“ ამომრჩევლისგან მოისმინა.
„ძალიან მოხარული ვარ, რომ თავად პარტიის დამფუძნებელმა, ბიძინა ივანიშვილმა ამ სპეკულაციებს წერტილი დაუსვა. მას არა მხოლოდ ჰქონდა უფლება ამისთვის წერტილი დაესვა, არამედ ის ვალდებულიც კი იყო, ეს განცხადება გაეკეთებინა, როგორც პარტიის დამფუძნებელს. ერთია, როდესაც გადიხარ პოლიტიკიდან და ის მართლაც გასულია პოლიტიკიდან, რაც პოლიტიკიდან გავიდა, ის მე თვალით არ მინახავს და არა მგონია პოლიტიკური პროცესებით ინტერესდებოდეს, მაგრამ მიუხედავად ამისა, იგი ვალდებული იყო, ეს განცხადება გაეკეთებინა“, – განაცხადა წულუკიანმა.
მისი თქმით, დღეიდან ამ განცხადების თანახმად, ნებისმიერი კითხვის ნიშანი ამოწურულია.
თებერვალში გახარიას ქმედება იყო საკუთარი გუნდისა და სახელმწიფოს ღალატი, – ამის შესახებ ბიძინა ივანიშვილის განცხადებაშია ნათქვამი, რომელიც დღეს გავრცელდა.