პარლამენტის ვიცე-სპიკერი არჩილ თალაკვაძე აცხადებს, რომ „ქართულ ოცნებას“ არჩევნებზე ლეგიტიმაციის პრობლემა არ ექნება. ასე უპასუხა მან ყოფილი პრემიერის, გიორგი გახარიას განცხადებას იმის თაობაზე, რომ მთავრობის ლეგიტიმაციის პრობლემის პირობებში რიგგარეშე არჩევნები მაინც იქნება.
„ეს განცხადება ძალიან დესტრუქციულად გამოიყურებოდა იმ ფონზე, რა ფონზეც გიორგი გახარიას უწევდა მუშაობა პრემიერ-მინისტრობისას. ამ 7 თვის განმავლობაში, როდესაც „ნაცმოძრაობა“ არჩევნებზე ძირს უთხრიდა დემოკრატიას და საბოტაჟს უცხადებდა პარლამენტს, მათი მთავარი გზავნილი სწორედ ეს იყო – რომ არჩევნებსა და მმართველ გუნდს არ აქვთ ლეგიტიმაცია. ეს შემდეგ ვერცერთ ფორმატში ვერ დაამტკიცეს, დღეს კი იგივე გზავნილი გვესმის გახარიასგან, რომ თუ არჩევნებზე მმართველი ძალა აიღებს 43%-ს და მეტს, ეს მაინც არ იქნება ლეგიტიმური. იმავეს ამბობდა „ნაცმოძრაობა“, რომ არ აქვს მნიშვნელობა არჩევნების შედეგებს, იმიტომ რომ „ოცნებას“ ლეგიტიმაცია მაინც არ აქვს. ამას ვინ წყვეტს? ვის აქვს იმის უფლება, არჩევნების შემდეგ გადაწყვიტოს, არსებობს თუ არა ლეგიტიმაცია? ამას წყვეტს ქართველი ხალხი. კანონში პირდაპირ არის განსაზღვრული ის პროცენტული მაჩვენებელი, რომლის შემდეგაც ის აყალიბებს უმრავლესობას. მე გარწმუნებთ, რომ ჩვენს პარტიას არ ექნება ლეგიტიმაციის პრობლემა“, – განაცხადა თალაკვაძემ.