იმას, თუ როგორ წარმოაჩენს მედია ჯო ბაიდენს, რეალობასთან კავშირი არ აქვს, – განაცხადა რუსეთის პრეზიდენტმა, ვლადიმერ პუტინმა.
„იმას, თუ როგორ წარმოაჩენს რუსული და ამერიკული მედია ჯო ბაიდენს, რეალობასთან კავშირი არ აქვს. ჯო ბაიდენი პროფესიონალია. მასთან ყურადღებითაა საჭირო მუშაობა, რამე რომ არ გამოგრჩეს“, – აღნიშნა რუსეთის პრეზიდენტმა.
რუსეთის პრეზიდენტმა ასევე განაცხადა, რომ ჟენევაში გამართული სამიტის ატმოსფერო დადებითი იყო და მხარეებმა მნიშვნელოვან პოზიციებზე ერთმანეთს გაუგეს.
ვლადიმერ პუტინმა ასევე ისაუბრა კიბერუსაფრთხოებაზე და აღნიშნა, რომ რუსეთმა და აშშ-მა ამ სფეროში უნდა ითანამშრომლონ.
16 ივნისს ჟენევაში აშშ-ისა და რუსეთის პრეზიდენტების შეხვედრა გაიმართა. ვლადიმერ პუტინმა განაცხადა, რომ ჯო ბაიდენთან შეხვედრაზე მტრული განწყობა არ ყოფილა და ორივე მხარემ ერთმანეთის გაგებისა და პოზიციების დაახლოების სურვილი გამოხატა. ჯო ბაიდენმა აღნიშნა, რომ აშშ-რუსეთის ურთიერთობები სტაბილური და პროგნოზირებადი უნდა იყოს.