შინაგან საქმეთა სამინისტროს საგანგებო სიტუაციების მართვის სამსახურის სახანძრო-სამაშველო ძალების დეპარტამენტის სტრუქტურული ქვედანაყოფების ხელმძღვანელმა პირებმა ოპერაციული დონის სამეთაურო კურსი გაიარეს.
სწავლების მიზანი იყო საგანგებო სიტუაციების დროს მოსამსახურეების მზადყოფნის ამაღლება და ქვეყანაში არსებული სამოქალაქო უსაფრთხოების სფეროში მართვის უნარ-ჩვევების განვითარება. გადამზადების კურსს სამსახურის სამოქალაქო უსაფრთხოების დეპარტამენტის წარმომადგენლები უძღვებოდნენ და მასში მონაწილეობას სულ სახანძრო-სამაშველო ძალების დეპარტამენტის 192 თანამშრომელი იღებდა.
სამდღიანი კურსის ფარგლებში მონაწილეებს ჩაუტარდათ როგორც თეორიული, ასევე პრაქტიკული მეცადინეობები. კურსის პროგრამა მოიცავდა ისეთ საკითხებს, როგორებიცაა საგანგებო სიტუაციების მართვის სამსახურის ფუნქციები, ძირითადი ამოცანები და როლი სამოქალაქო უსაფრთხოების ეროვნულ სისტემაში. კურსის დასრულების შემდეგ, მსმენელები მიღებული ცოდნის დასადასტურებლად ტესტურ დავალებებს ასრულებენ.
სახანძრო-სამაშველო ძალების დეპარტამენტის სტრუქტურული დანაყოფების ხელმძღვანელ თანამდებობებზე დანიშნული მოსამსახურეებისთვის ოპერაციული დონის სამეთაურო კურსი მთელი საქართველოს მასშტაბით ყოველწლიურად ტარდება.