ჯანდაცვის მსოფლიო ორგანიზაციის პროგნოზით, COVID-19-ის მიმართ ყველაზე დაუცველ პირებს, მაგალითად ხანდაზმულებს, ყოველწლიურად რევაქცინაციის გავლა დასჭირდებათ ვირუსის ვარიანტებისგან დასაცავად. ინფორმაციას ამის შესახებ სააგენტო Reuters-ი ჯანდაცვის მსოფლიო ორგანიზაციის დოკუმენტზე დაყრდნობით ავრცელებს.
როგორც საინფორმაციო სააგენტო Reuters-ი იუწყება, აღნიშნული შეფასება იმ მოხსენებაშია მოცემული, რომელსაც ჯანდაცვის მსოფლიო ორგანიზაცია ვაქცინის ალიანსის, GAVI-ს გამგეობის სხდომაზე განიხილავს.
მანამდე ვაქცინის მწარმოებლები Moderna და Pfizer-ი აცხადებდნენ, რომ მალე ვაქცინის გამაძლიერებელი დოზები იქნება საჭირო იმუნიტეტის მაღალი დონის შესანარჩუნებლად.
დოკუმენტი ცხადყოფს, რომ ჯანდაცვის მსოფლიო ორგანიზაცია მაღალი რისკის ჯგუფში შემავალ პირთა ყოველწლიურ რევაქცინაციას განიხილავს, როგორც საბაზისო სცენარს.
საბაზისო სცენარის მიხედვით, ახალი ვარიანტების გაჩენა გაგრძელდება, ხოლო ვაქცინები რეგულარულად განახლდება ამ საფრთხეების შესაბამისად.
როგორც საინფორმაციო სააგენტო Reuters-ი იუწყება, ჯანდაცვის მსოფლიო ორგანიზაციამ უარი თქვა შიდა დოკუმენტის შინაარსზე კომენტარის გაკეთებაზე.