მინდა აქცენტი გავაკეთო იმაზე, რომ გასული ორი-სამი დღის განმავლობაში განვახორციელეთ პედიატრიული საწოლების მობილიზება. რაც მიუთითებს ბავშვებში ინფექციის გავრცელების მაღალ მაჩვენებელზე, – ამის შესახებ ჯანდაცვის მინისტრის მოადგილე თამარ გაბუნიამ საკოორდინაციო საბჭოს დასრულების შემდეგ განაცხადა.
„თბილისში მობილიზებულია 200-მდე პედიატრიული საწოლი, რომელიც ეპიდემიის მეორე-მესამე ტალღის პერიოდში დაუტვირთავი იყო, უკვე გადატვირთულია და მოგვიხდა დამატებითი საწოლების მობილიზება. ინფექციის გავრცელების რისკები იზრდება“, – განაცხადა გაბუნიამ.
მისი თქმით COVID-19-ის გუშინდელი შემთხვევების რაოდენობა აღემატება 1 800-ს. „ეს გარკვეულწილად ჯამური მაჩვენებელია, თუმცა მაინც მიუთითებს ბოლო ორი კვირის განმავლობაში შემთხვევების განსაკუთრებით გააქტიურებაზე“, – აღნიშნა გაბუნიამ.
ამ დროისთვის საქართველოში კორონავირუსის 377 811 შემთხვევაა დადასტურებული. მათ შორის გამოჯანმრთელდა 359 939, გარდაიცვალა 5 468 პაციენტი.