კრემლის პროპაგანდა წლებია ადამიანის ფუნდამენტურ უფლებებს დასავლურ პროექტად რაცხავს, რომელიც თითქოს რუსეთის, როგორც გეოპოლიტიკური აქტორის მსოფლიო რუკიდან გაქრობას ემსახურება. ჩინეთი და რუსეთი მუდმივად ცდილობენ სუვერენიტეტის ცნება ინსტრუმენტად გადააქციონ და მას მუდმივად ისე განმარტავენ, როგორც ავტოკრატიულ რეჟიმებს აწყობთ. დასავლური ღირებულებების ერთგულება და კაცობრიობის წინააღმდეგ ჩადენილი დანაშაულის გაპროტესტება სუვერენიტეტის ნორმის დარღვევა ნამდვილად არ არის. თუმცა, ჩინეთის მიერ უიღურებისთვის მოწყობილი გენოციდი ადამიანის უფლებების უხეში დარღვევაა, მეზობელი სახელმწიფოების ტერიტორიების მიტაცება კი, რუსეთის მხრიდან სუვერენიტეტის პრინციპის უპატივცემულობა. პუტინის რეჟიმის ოპერაციები სხვა ქვეყნებში ელექტორალურ პროცესებში, შიდა საქმეებში ჩარევის სახელმძღვანელოდაც კი გამოდგება. რუსეთისა და ჩინეთის კოორდინირებული დეზინფორმაციის კამპანიები სამართლებრივ წესრიგსა და საერთაშორისო სისტემას ემუქრება. ეს კამპანიები მსოფლიოს ნებისმიერ წერტილში მცხოვრებ ადამიანებს აზარალებს, რადგან კაცობრიობის უდიდესი მიღწევით, ფუნდამენტური უფლებებით ყველა სარგებლობს. რაც ყველაზე საინტერესოა, რუსი მოქალაქეების ფულით დაფინანსებული კრემლის მედია ჩინეთს ეხმარება, მაშინ როდესაც ეს ქვეყანა თავად რუსეთის ეროვნულ უსაფრთხოებას და შესაბამისად მოქალაქეებს ემუქრება.
ჩინეთი მიზანმიმართულად უტევს დასავლური საერთაშორისო წესრიგის ფუნდამენტს – ადამიანის ძირითად უფლებებს და ამაში მას კრემლის პროპაგანდა ეხმარება. თავდასხმა თავდაცვის ნაცვლად მოსკოვის სახელმწიფო მედიის ნაცადი ტაქტიკაა. პუტინის მედია პრეზიდენტის იმიჯის გამოსასწორებლად ოპონენტებზე ცრუ ამბებს ავრცელებს და მათ სხვადასხვა დანაშაულს ყოველგვარი მტკიცებულებების გარეშე აბრალებს. ამ შემთხვევაშიც, კრემლი ჩინეთისთვის იგივეს აკეთებს.
„სხვა ქვეყნების შიდა საქმეებში ჩარევის ნაცვლად ევროპას ურჩევნია შიდა პრობლემეს მიხედოს“ – რუსული სახელმწიფო მედიის საშუალებით სწორედ ეს ნარატივი ვრცელდება. სინამდვილეში ყველაფერი ძალიან მარტივად არის: ჩინეთისგან განსხვავებით, ევროპის არცერთ ქვეყანას არ აქვს თანამედროვე საკონცენტრაციო ბანაკები. ადამიანის უფლებები ყველგან ირღვევა, ასე რომ არ იყოს მათი სიაც არ იარსებებდა და არც საერთაშორისო ადამიანის უფლებათა სასამართლოები, სადაც დარღვეული უფლებებისთვის პასუხი შეგვიძლია მოვითხოვოთ. უბრალოდ დასავლური საზოგადოება ღიაა დისკუსიისთვის, მიუკერძოებელი სასამართლო კი, მოქალაქეების უფლებებს იცავს. სწორედ იმიტომ, რომ ევროპა დემოკრატიულია, არავინ უწესებს მედიას ცენზურას, არც ყველა ტელევიზიას ყიდულობს რომელიმე პრეზიდენტი, რომ სიმართლე დამალოს. ევროპაში პრობლემებზე ღიად საუბარი ისეთივე ჩვეულებრივი მოვლენაა როგორიც ძილი ან ჭამა. ამიტომაც, სანამ რუსეთი და ჩინეთი ყალბი ამბების გავრცელებით არიან დაკავებულები, ევროპა ოპონენტებს „ნოვიჩოკით“ არ უმასპინძლდება. პირიქით, გამოწვევებს ღირსეულად უმკლავდება.
ღირსეული შრომის საერთაშორისო დღის შემდეგ, რუსულმა პროპაგანდისტულმა საშუალებამ „რუსული გაზეთი“ უიღურების იძულებითი შრომის ამბავი ჩინეთის ნარატივს მოარგო და მკითხველს მოატყუა, თითქოს სინიანში უიღურები ოცნებებს იხდენენ. სინამდვილეში ჩინეთი რეგიონში კაცობრიობის წინააღმდეგ დანაშაულს ჩადის, რადგან მუსლიმთა ეთნიკურ უმცირესობის მილიონზე მეტ წარმომადგენელს გამოსასწორებელ ბანაკში იძულებით ამყოფებს, ასი ათასობით მათგანი კი, უკანონო პატიმრობაში ჰყავს. რუსული პროპაგანდა „ოცნებების ახდენას“ იძულებით შრომას და ქალების სტერილიზაციას უწოდებს. მსოფლიო მედიაში ბანაკებიდან სასწაულებრივად გამოქცეული უიღურების ინტერვიუებიც არსებობს, სადაც ისინი მათ გამოვლილი ჯოჯოხეთის შესახებ დეტალურად ყვებიან. წამყვანი ორგანიზაციები „Amnesty International“ და „Human Rights Watch“ თავიანთ ანგარიშებში ჩინეთის მიერ კაცობრიობის წინააღმდეგ ჩადენილ დანაშაულზე პირდაპირ წერენ.
სინიანის მკვიდრი უიღურები თურქულენოვანი ხალხია, ტრადიციით სუნიტური ისლამის მიმდევარი და ცენტრალური აზიის ხალხებთან მათ გაცილებით მეტი აკავშირებთ, ვიდრე ხანებთან, რომლებიც ჩინეთში ეთნიკურ უმრავლესობას შეადგენენ. ამიტომაც, ჩინეთის სახელმწიფო, უიღურების სრულ ასიმილაციას ძალდატანებით ცდილობს. ჩინეთის კანონმდებლობა, რეგიონულ მთავრობას, “საგანმანათლებლო და საწვრთნელი ცენტრების” “ექსტრემისტული გავლენების” ქვეშ მყოფ პირთა გამოსასწორებლად გამოყენების საშუალებას ოფიციალურად აძლევს. კანონის თანახმად, ცენტრებში მანდარინი უნდა ისწავლებოდეს და “იდეოლოგიური განათლება, ფსიქოლოგიური რეაბილიტაცია და ქცევის გამოსწორებაც” უნდა ხდებოდეს.
„რუსულ გაზეთში“ უიღურების შესახებ ჩინეთის სასარგებლოდ გამოქვეყნებული სტატია დეზინფორმაციის პირველი მაგალითი არ არის. 2017 წელს რუსეთის „სპუტნიკმა“ და ჩინეთის „გლობალ თაიმსმა“ შეთანხმებას მოაწერეს ხელი და სახელმწიფოს საკუთრებაში არსებული პროპაგანდისტული საშუალებების თანამშრომლობაც აქედან დაიწყო. ოფიციალური მიზანი ასეთია: „ჩინეთისა და რუსეთის განვითარების შესახებ საერთაშორისო საზოგადოებისთვის ინფორმაციის მიწოდება. ასევე ამ ორი ქვეყნის მხრიდან საერთაშორისო მოვლენების შესახებ გამოთქმული კრიტიკული აზრის გავრცელება.“ არაოფიციალურად კი ის ხდება, რომ კრემლის პროპაგანდისტული საშუალებები რამდენიმე ენაზე ავრცელებენ ყალბ ამბებს და იძულებითი შრომისა თუ გენოციდის შესახებ ინფორმაციის დამალვაში ჩინეთს ეხმარებიან. „რია ნოვოსწი“ იმასაც კი ცრუობდა, რომ ევროპაში უიღურების წინააღმდეგ კამპანია მიზნად ბეიჯინგში 2022 წელს გასამართ ზამთრის ოლიმპიური თამაშების დისკრედიტაციას ისახავდა. რუსული სახელმწიფო მედიის ჟურნალისტები სხვადასხვა დროს სიუჟეტებსაც ავრცელებდნენ სინიანიდან და ბედნიერი სახეებით გვამცნობდნენ, რომ ხალხი იქ ნამდვილ სამოთხეში ცხოვრობს.
რუსეთი დეზინფორმაციის კამპანიით ჩინეთის მიერ მოწყობილი გენოციდის თანამონაწილეა, რასაც არაერთი ფოტო თუ ვიდეო მასალა და მოწმეთა ჩვენებები ადასტურებს. აი ასეთია ჩვენი ჩრდილოელი მეზობელი – ცრუ და ყველანაირი ბოროტების მოტრფიალე. საქართველოს მოქალაქეებს რუსეთის ნამდვილი სახე არ ესწავლებათ, 90-იან წლებში ხომ სწორედ ამ ქვეყნის ჯარისკაცები ედგნენ სათავეში ოკუპირებულ ტერიტორიებზე ქართველების ეთნიკურ წმენდას. ერთმორწმუნე რუსების თაოსნობით სეპარატისტები ეკლესიებში ვარდებოდნენ და სასულიერო პირებსაც კი აწამებდნენ. კრემლი არ იცვლება, ახლა რუსეთის საკუთრებაში არსებული მედია თანამედროვე საკონცენტრაციო ბანაკების დასაცავად ძალას არ იშურებს და ადამიანების უფლებების დარღვევას ამართლებს.
ლადო კახიძე