ხორავას ქუჩაზე მომხდარი მკვლელობის საქმეზე დაკავებული გიორგი მენაბდე პატიმრობაში რჩება. სასამართლომ არ გაითვალისწინა დაცვის მხარის შუამდგომლობა აღკვეთის ღონისძიების შეცვლის საკითხზე. მოსამართლემ მოტივად ბრალდებულის მიმალვის საფრთხე დაასახელა.
დღესვე, სხდომაზე გამოიკითხა ზაზა სარალიძეც. გარდაცვლილის მამამ მკვლელობის შემდეგ განვითარებული მოვლენები გაიხსენა.
კიდევ ერთხელ გაუსვა ხაზი იმას, რომ გიორგი მენაბდის ბრალდებით საქმე არ სრულდება. საქმე არ დასრულდება, ვიდრე სამოხელეო ნაწილი პასუხგაცემული არ იქნება და არ გამოიკვეთება, თუ ვინ მიიღო ამ საქმეში მონაწილეობა. “მენაბდის მიმართ წარდგენილ ბრალს, რა თქმა უნდა, სჭირდებოდა მტკიცებულებების შეგროვება, რადგან, ყველამ კარგად ვიცით, რომ, ამ საქმეში, არასრულწლოვნები არ საუბრობდნენ და ყველანაირად აფარებდნენ ხელს დამნაშავე პირებს“, – აცხადებს ზაზა სარალიძის ადვოკატი ნესტან ლონდარიძე.
გიორგი მენაბდეს, აღკვეთის ღონისძიების სახით, პატიმრობა 16 აპრილს შეეფარდა. სამართალდამცველებმა ის 2021 წლის 14 აპრილს დააკავეს. მას ბრალდება საქართველოს სისხლის სამართლის კოდექსის 109-ე მუხლის მე-2 ნაწილის „ბ“ და „ე“ ქვეპუნქტებით (განზრახ მკვლელობა, ჩადენილი ჯგუფურად, წინასწარი შეცნობით არასრულწლოვანის მიმართ) წარედგინა, რაც სასჯელის სახედ და ზომად 13-დან 17 წლამდე თავისუფლების აღკვეთას ითვალისწინებს.
პროკურატურის განცხადების თანახმად, „შინაგან საქმეთა სამინისტროში მიმდინარე გამოძიების ფარგლებში, სისხლის სამართლის საქმეზე მოპოვებული დამატებითი მტკიცებულებების საფუძველზე, დადგინდა, რომ 2017 წლის 1-ელ დეკემბერს, ხორავას ქუჩა N4-ში არსებული საცხოვრებელი კორპუსის ეზოში, ფიზიკური დაპირისპირების დროს გ.ჯ.-მ, მ.კ.-მ და გ.მ.-მ, ბასრი საგნების გამოყენებით, მოკვლის განზრახვით, ჯგუფურად, 12 ჭრილობა მიაყენეს, წინასწარი შეცნობით არასრულწლოვან დავით სარალიძეს. მიყენებული ჭრილობების შედეგად დავით სარალიძე საავადმყოფოში გარდაიცვალა“.