დღეს Pfizer-ის მეორე დოზებზე განახლდება რეგისტრაცია და ვინც მეორე დოზით იცრება, უკვე 36 კლინიკაში, 26 ივლისიდან 16 აგვისტომდე შეეძლებათ სასურველ დროზე რეგისტრაცია, – ამის შესახებ ჯანდაცვის მინისტრმა, ეკატერინე ტიკარაძემ საკოორდინაციო საბჭოს სხდომის შემდეგ გამართულ ბრიფინგზე განაცხადა.
“Pfizer-ის ვაქცინის მეორე დოზის მიღებაზე რეკომენდაცია 21 დღეა. მოგმართავთ თხოვნით, რომ “ფაიზერის” მეორე დოზაზე 24 ივლისის 12:00 საათამდე დარეგისტრირდეთ, სხვა შემთხვევაში რეგისტრაცია ავტომატურად იმავე კლინიკაში მოხდება, სადაც მათ პირველ აცრაზე მიიღეს მომსახურება, თუმცა ამ ჯავშნის მიღების შემდეგ ექნებათ საშუალება შეცვალონ მათთვის სასურველი დრო და კლინიკა, ცოტა მოგვიანებით”, – აღნიშნა ეკატერინე ტიკარაძემ.
რაც შეეხება Pfizer-ის პირველ დოზაზე რეგისტრაციას, მინისტრის თქმით, ამ ეტაპზე რეგისტრაცია მინიმუმ 180 000 ადამიანზე მეტს შეეძლება.
“ვაქცინის რაოდენობიდან გამომდინარე მიწოდება უკვე გვაქვს საკმაოდ მაღალი და ასევე ამცრელი ბრიგადების რაოდენობაც საკმარისია იმისათვის, რომ ვაქცინის ადმინისტრირება მოხდეს. მოსახლეობა დარწმუნებული უნდა იყოს, რომ პირველივე წუთებში რეგისტრაცია საჭირო არ არის. Pfizer-ის 250 000 დოზა იქნება სლოტად გამოტანილი და გავხსნით ჯავშნების 20-დღიან შესაძლებლობას. ამ ეტაპზე მხოლოდ Pfizer-ისთვის მობილიზებულია 108 ბრიგადა. მოთხოვნადობის მიხედვით 3 დღის განმავლობაში ჩვენ შეგვეძლება ასევე დამატებითი ბრიგადების მობილიზება და გამტარუნარიანობის გაზრდა. დღეს არსებული 108 ბრიგადით ჩვენ შეგვიძლია 20 დღის განმავლობაში 180 000-ზე მეტ ადამიანს გავუწიოთ მომსახურება. მხოლოდ თბილისის მასშტაბით კი 50 ბრიგადის დამატებით ჩვენ შეგვეძლება გამტარუნარიანობა გავზარდოთ 211 000-მდე. ხოლო რეგიონების მასშტაბით, მოთხოვნადობის შემთხვევაში, ბრიგადების დამატების შემთხვევაში შეგვეძლება გავზარდოთ 254 000-მდე. პარალელურად შესყიდული Pfizer-ის რაოდენობის მოწოდება ქვეყანაში ყოველკვირეულად განხორციელდება და ეს დოზებიც ჩაერთვება მოსახლეობის ვაქცინაციაში”, – განაცხადა ეკატერინე ტიკარაძემ.