ფინანსთა სამინისტროს მიერ გაკეთებულ პრეზენტაციაში, რომელიც მოიცავდა 10-წლიან გეგმას, ერთ-ერთი მნიშვნელოვანი მიმართულებაა ძლიერი საჯარო სექტორი, რომლის გარეშეც ქვეყანაში ვერ მიიღწევა ძალიან ბევრი მნიშვნელოვანი მიზანი და რეფორმა, – ამის შესახებ ფინანსთა მინისტრმა, ლაშა ხუციშვილმა მთავრობის სხდომის დასრულების შემდეგ გამართულ ბრიფინგზე განაცხადა.
მისივე განმარტებით, ბოლო 5-7 წლის განმავლობაში, ერთეული გამონაკლისების გარდა, საჯარო სექტორში ხელფასები პრაქტიკულად გაყინული იყო.
„ხელფასები არ გაზრდილა, რაც საბოლოო ჯამში მიგვიყანს იქამდე, რომ მნიშვნელოვნად დაეცემა საჯარო სექტორის კონკურენტუნარიანობა და შეფერხდება ის რეფორმები, რომელიც ქვეყანაში ხორციელდება. შესაბამისად, ჩვენ მიერ დისკუსიისთვის გამოტანილი იყო საკითხი, რომ საჯარო მოხელეების ხელფასები არ უნდა იყოს გარკვეული პოლიტიკური სპეკულაციების საგანი და ეს უნდა იყოს გარკვეულ ფორმულაზე ან ინდექსაცისა და წესებზე დაფუძნებული“, – განაცხადა ფინანსთა მინისტრმა.