ბოლო 4 წლის განმავლობაში ბევრი სასიკეთო საქმე გავაკეთეთ ქალაქელებისთვის და გპირდებით, რომ მომდევნო 4 წლის განმავლობაში 24-საათიან რეჟიმში ვიმუშავებთ და თავს არ დავზოგავთ იმისთვის, რომ ჩვენი ქალაქი იყოს ყველაზე მწვანე, ყველაზე მოწესრიგებული, განახლებული ტრანსპორტისა და ეკომეგობრული ტრანსპორტი მქონე, – ამის შესახებ დედაქალაქის მერმა, თბილისის მერის არჩევნებზე „ქართული ოცნების“ კანდიდატმა, კახა კალაძემ განაცხადა.
„პირველ რიგში მინდა მადლობა გადავუხადო ყველა იმ თბილისელს, რომელიც მხარს მიჭერს. მადლობას ვუხდი ყველა თბილისელს, რომელსაც ჩემი და ჩემი გუნდის – „ქართული ოცნების“ იმედი აქვს. ბოლო 4 წლის განმავლობაში ბევრი სასიკეთო საქმე გავაკეთეთ ქალაქელებისთვის და გპირდებით, რომ მომდევნო 4 წლის განმავლობაში 24-საათიან რეჟიმში ვიმუშავებთ და თავს არ დავზოგავთ იმისთვის, რომ ჩვენი ქალაქი იყოს ყველაზე მწვანე, ყველაზე მოწესრიგებული, განახლებული ტრანსპორტისა და ეკომეგობრული ტრანსპორტი მქონე. ყველა უბანში უნდა შევიტანოთ მეტი სიცოცხლე. ჩვენ ამ სტიმულს გვაძლევს მოსახლეობის დამოკიდებულება, რომელსაც ყოველდღე ვგრძნობთ. პირადად ჩემთვის და ჩემი თანაგუნდელებისთვის ეს სიყვარული და კეთილგანწყობა არის უდიდესი სტიმული. ეს ძალიან დასაფასებელია და ძალიან ვუფრთხილდები, დიდი მოწიწებით ვუდგები ამ სიყვარულს. გპირდებით, რომ მომდევნო 4 წელი კიდევ უფრო მეტს ვიშრომებ, უფრო მეტ მაგარ პროექტს გავაკეთებ, რათა ყველა თბილისელმა და ჩამოსულმა სტუმარმა იამაყოს და თქვას, რომ დედაქალაქში ამდენი მაგარი პროექტი განხორციელდა“, – განაცხადა კალაძემ.