„ნაციონალური მოძრაობის” აქტივისტი ირაკლი თოდუა, რომელიც ყოფილი ძალოვანი და ამჟამად ენმ-ს კოორდინატორია ნარაზენში, ფიზიკურად დაუპირისპირდა „ქართული ოცნების“ კოორდინატორს ზაალ ზარანდიას.
დაპირისპირების მიზეზი მიხეილ სააკაშვილის დღევანდელი განცხადებაა, ირაკლი თოდუამ „ქართული ოცნების“ კოორდინატორს განუცხადა, რომ ახლა მისი დრო დაბრუნდა და ყველას გაუსწორდება, რის შემდეგაც მასზე იძალადა. ზაალ ზარანდია საავადმყოფოშია გადაყვანილი.
თოდუასთან ერთად რუხში აქტიურობს ზუგდიდის ციხის ყოფილი უფროსი ამირან ჯანაშია, ის „ქართული ოცნების“ რამდენიმე აგიტატორს დღეს მიუვარდა და მათზე სიტყვიერი მუქარა განახორციელა.
საქართველოს ყოფილმა პრეზიდენტმა, უკრაინის რეფორმების აღმასრულებელი საბჭოს თავმჯდომარე მიხეილ სააკაშვილმა დღეს საკუთარ გვერდზე გამოაქვეყნა პოსტი, რომლითაც მიანიშნებს, რომ არალეგალურად შემოვიდა ქვეყანაში და უკვე საქართველოშია. ასევე, მიხეილ სააკაშვილმა გაავრცელა ვიდეო, სადაც ამბობს, რომ ბათუმში იმყოფება.
საქართველოს შინაგან საქმეთა სამინისტროში ყოფილი პრეზიდენტის, მიხეილ სააკაშვილის საქართველოში ჩამოსვლასთან დაკავშირებით აცხადებენ, რომ სააკაშვილს საქართველოს საზღვარი არ გადმოუკვეთავს.