ბრიტანული გამოცემა The Telegraph-მა ბორჯღალოსნების მთავარ მწვრთნელთან, ლევან მაისაშვილთან ინტერვიუ გამოაქვეყნა.
ინტერვიუს დიდი ნაწილი საქართველოს ნაკრების მწვრთნელის ჯანმრთელობის მდგომარეობას ეხებოდა. შეგახსენებთ, რომ მაისაშვილი სამხრეთ აფრიკაში კორონავირუსით დაინფიცირდა და იოჰანესბურგის ერთ-ერთ საავადმყოფოში, ერთ თვე უგონო მდგომარეობაში იყო.
ლევან მაისაშვილი: „ძალიან მძიმე მდგომარეობაში ვიყავი, მაგრამ, თავად არაფერი მახსოვს. როგორც შემდეგ ექიმებმა მითხრეს, ფილტვები სრულებით პარალიზებული იყო. ეს ნამდვილი ჯოჯოხეთი იყო. სიცოცხლისა და სიკვდილის ზღვარზე ვიყავი, ჩემი გადარჩენის შანსი 2% იყო. პირველად როცა ავდექი, ერთი ნაბიჯი წინ გადავდგი, მეორე – უკან და შემდეგ ნახევარი საათი ვისვენებდი. თავს ისე ვგრძნობდი, როგორც ევზი ხმელეთზე.
დაინფიცირებამდე 85 კგ. ვიყავი, ხოლო როდესაც გავიღვიძე – 60-62. სიარულზე საუბარიც კი არ იყო და თავდაპირველად, ფეხზე დგომაც კი წინსვლად ჩაითვალა. ძალიან, ძალიან, რთული იყო, თუმცა, უკვე ყველაფერი წესრიგშია.
მითხრეს, რომ საქართველოში ჩემი ამბავი ყველამ გაიგო და მგულშემატკივრობდნენ. სამშობლო ძალიან მიყვარს და როდესაც თუნდაც ერთკვირიანი მოგზაურობის შემდეგ ვბრუნდები, დიდი ემოციები მაქვს. გასაგებ მიზეზთა გამო, ამჯერად, ყველაფერი კიდევ უფრო განსაკუთრებული იყო. ოჯახის წევრები, მეგობრები, თანაგუნდელები, მორაგბეები, ყველანი დამხვდნენ“.
საქართველოს ნაკრების მთავარმა მწვრთნელმა აღნიშნა, რომ ახლა თავს კარგად გრძნობს და საკუთარ საქმეს კიდევ უფრო დიდი პასუხისმგებლობით დაუბრუნდა.