ლიკა წერეთელი სოციალურ ქსელში გელა ჩარკვიანის შესახებ წერს.
“ადამიანი, რომლის გვერდით 10 საოცარი წელი გავატარე, რომელიც ყოველ დღე მაჩვენებდა, რა არის პროფესიონალიზმი, პატიოსნება, აუთენტურობა; რომელიც ადამიანური ურთიერთობების ისეთივე ოსტატი იყო, როგორც საერთაშორისოსი. იმდენი რამე მახსენდება: ჩვენი სახელდახელოდ ოფისში მოწყობილი საშობაო ხმაურიანი ზეიმები, სამდივნოდან ცისანა რომ რეკავდა და – ბატონი ედუარდი კითხულობს, ჩარკვიანთან რა ხდებაო; დელეგაციებთან შეხვედრებზე ჩანაწერებთან ერთად იქვე, ფურცლებზე საწერი პასტით შესრულებული საოცარი ნახატები, მისი განუმეორებელი იუმორი სხვადასხვა “კაზუსების” მოყოლისას, ჩვენი შეხვედრები სამსახურისგან დამოუკიდებლად, როცა როიალს მიუჯდებოდა ხოლმე და ჩვენთვის უკრავდა, ჩვენი რეგულარული შეხვედრები უკვე 2003 წლის შემდეგ: ხან მისი წიგნების პრეზენტაციებზე, ხან მასთან სახლში, სადაც ასე მიყვარდა სტუმრობა. მახსოვს, როგორ განიცადა ჩვენი ნათიას წასვლა: ჩვენი ყველაზე ნიჭიერი ბავშვიო…😢
არ დამავიწყდება, ჩემმა (მაშინ ჯერ კიდევ10 წლის, იოგაზე აქტიურად მოსიარულე) ნიკამ პირველად რომ ნახა, ჩუმად მითხრა: ამ ძიას მესამე თვალი აქვს გახსნილიო. ეს რომ გადავეცი, ბავშვივით გაუხარდა და ასე მითხრა: ბავშვი ყველაფერს ხედავსო. მას მერეც შევახვედრე წიგნების ბაზრობაზე და ახლაც მოუთმენლად ელოდა, პანდემიამ გადაიაროს, რომ ბატონ გელასთან მივიდეთო. მხოლოდ გამოსამშვიდობებლად გამოგვივა მისვლა… 💔
ჩემებო, გელას გუნდო, აქაც ერთად ვართ! მიყვარხართ ყველანი! მიყვარხართ ბატონო გელა!”