მიხეილ სააკაშვილის მიერ შიმშილობის შეწყვეტის შესახებ გადაწყვეტილება, პირდაპირ უკავშირდება სახელმწიფოს შემხვედრ ნაბიჯს სარეაბილიტაციო პროცესის ჩატარებისა იმგვარ კლინიკაში, რომელიც ამ ურთულეს პროცესს სრული დატვირთვით უზრუნველყოფს, – ამის შესახებ საქართველოს ყოფილი პრეზიდენტის, მიხეილ სააკაშვილის ადვოკატმა, ნიკა გვარამიამ განაცხადა.
„ხელისუფლებას აქვე შევახსენებ სტრასბურგის სასამართლოს გადაწყვეტილებას, რომელმაც პირდაპირ ჩაწერა, თუ შეწყდება შიმშილობა რეაბილიტაციის პროცესი აუცილებლად უნდა იყოს შესაბამის კლინიკაში, მაღალკვალიფიციური მომსახურების პირობებში და ასევე უსაფრთხოების სრული დაცვით“, – განაცხადა ნიკა გვარამიამ.
მისივე თქმით, გადაწყვეტილება უნდა იყოს მიღებული უახლოეს საათებში, რადგან მიხეილ სააკაშვილს ჯანმრთელობის პრობლემები აქვს.
„მიხეილ სააკაშვილს უკვე დაკლებული აქვს 25 კილოგრამი, მას პრაქტიკულად, ძალიან სერიოზული პრობლემები აქვს უკვე კალიუმთანდაკავშირებით, მისი დღევანდელი მაჩვენებელი არის 2.7 და 2 არის უკვე ის მაჩვენებელი, რომელზეც ვითარდება ინფარქტი ან ინსულტი. დღეს მას ჩემს შესვლამდე ჰქონდა ჰიპერტონიული კრიზი, ძალიან მაღალი წნევა, შესაბამისად, ყოველი საათი მნიშვნელოვანია. მიხეილ სააკაშვილი სახელმწიფოებრივად და ისტორიულად უმნიშვნელოვანესი გადაწყვეტილება მიიღო, მაგრამ ეს გადაწყვეტილება აღსრულდება მას, შემდეგ რაც ხელისუფლება შეასრულებს არა მიხეილ სააკაშვილის ულტიმატუმს, არამედ საერთაშორისო თანამეგობრობის მოწოდებებს და სტრასბურგის სასამართლოს გადაწყვეტილებას, ამას მიხეილ სააკაშვილის მოთხოვნა ნამდვილად არ სცდება“, – განაცხადა გვარამიამ.
მისივე თქმით, ახლა გადამწყვეტი იქნება ხელისუფლების გადაწყვეტილება.
„ხელისუფლებას თუ სასიკვდილო განაჩენის კიდევ ერთხელ გამოტანა უნდა მიხეილ სააკაშვილისთვის, ის ამას გააკეთებს, მაგრამ მიხეილ სააკაშვილმა უკვე განაცხადა მზაობა შიმშილობის შეწყვეტისთვის, თუმცა ეს არის სრულიად სამართლიანი დათქმის პირობებში. მიხეილ სააკაშვილის შიმშილობის შეწყვეტა კიდევ უფრო კვალიფიციური პერსონალის პირობებში რომ არ მოხდეს, იგი გარდაიცვლება. რეაბილიტაციის პროცესის მართვა ძალიან რთული პროცესია, გრამაჟობით ხდება უკვე დამატება საკვების მიცემა, მცირე ცვლილებაც რომ მოხდეს, შეიძლება დაუყონებლივისიკვდილი დადგეს. ამიტომ ხელისუფლების პასუხი ამაზე ადეკვატური თუ არ იქნება, ეს იქნება საბოლოო სასიკვდილო განაჩენი მიხეილ სააკაშვილისთვის. მიხეილ სააკაშვილის სიკვდილის ფაქტი ამ ქვეყანაში გამოიწვევს უმძიმეს შედეგებს, რაც იქნება ხელისუფლების დაგეგმილი და ასევე პროვოკაციებიც იქნება, რომ პროცესები განვითარდეს უმძიმესი სცენარით. მიხეილ სააკაშვილი, როგორც სახელმწიფოებრივად მოაზროვნე და ლიდერი, იღებს გადაწყვეტილებას. დღეს ჩვენ არ გვყავს ხელისუფლება, სახელმწიფოებრივად მნიშვნელოვან გადაწყვეტილებებს ისევ იღებს მიხეილ სააკაშვილი“, – აღნიშნა ნიკა გვარამიამ.