“ნაციონალური მოძრაობის თავმჯდომარე, ნიკა მელია ყოფილი პრეზიდენტის, მიხეილ სააკაშვილის იმ გადაწყვეტილებას ეხმიანება, სადაც ექსპრეზიდენტი აცხადებს, რომ გარკვეული პირობის შეწყვეტის სანაცვლოდ მზადაა შიმშილობა შეწყვიტოს.
როგორც ნიკა მელია აღნიშნული საკითხის კომენტირებისას მედიასთან აცხადებს, ის ექსპრეზიდენტის გადაწყვეტილებას მიესალმება. მისივე თქმით, ამით დადასტურდა ის, რომ ოპოზიციის, კერძოდ, მიხეილ სააკაშვილის გეგმა ამ ქვეყნის განვითარებას ემსახურება და არა მმართველი გუნდის რაიმე პროვოკაციაში ჩართვას.
“მწვავე პროტესტი არაძალადობრივი, ყოველდღიური, დისციპლინირებული, ხანგრძლივი, ორგანიზებული და უწყვეტი უკვე ყველა ვრწმუნდებით, რომ თავის შედეგს იღებს. ვრწმუნდებით, რომ ეს პროტესტის ის ფორმაა, რომელიც არ შედიოდა და არ შედის რეჟიმის ფორმებში, მაგრამ შედის ამ ქვეყნის მომავლის გეგმებში და ჩვენ ვაცნობიერებთ, რომ შუალედური ამოცანა არის მხოლოდ უახლოეს პერიოდში ჩვენთვის შესასრულებელი და გადასაწყვეტი, რომელიც გულისხმობს მიხეილ სააკაშვილის საპყრობილედან დახსნას.
მე და მისი მეგობრები მივესალმებით მის გადაწყვეტილებას. კიდევ ერთხელ დადასტურდა, რომ ქართული ოპოზიციის, მიხეილ სააკაშვილის გეგმა არის ამ ქვეყნის განვითარება და არა ხელისუფლების რეჟიმის ანკესზე წამოგება და პროვოკაციაში ჩათრევა, რასაც გეგმავდა ხელისუფლება და რეჟიმი, მაგრამ არაფერი არ გამოუვიდა. ყველა ვაცნობიერებთ, რომ მიხეილ სააკაშვილის დახსნასთან ერთად ჩვენი ამოცანაა გადავწყვიტოთ საკითხი, რა გვინდა ვიყოთ – დასავლური, ცივილიზებული სახელმწიფო თუ რუსეთის უკანა ეზო.
იმასაც ვაცნობიერებთ, რომ მიხეილ სააკაშვილის პატიმრობა არ არის მხოლოდ ივანიშვილის პირადი შურისძიება მის წინააღმდეგ, არამედ ეს არის ძღვენი პუტინთან, მაგრამ არაუშავს, დიდი გამარჯვებები ასე მოდის – დიდი ძალისხმევით, მოთმენით და არაძალადობრივი ხანგრძლივი პროტესტით“, – განაცხადა ნიკა მელიამ.
შეგახსენებთ, საქართველოს მესამე პრეზიდენტი, მიხეილ სააკაშვილი სტრასბურგის სასამართლოს მოწოდებას ითვალისწინებს და შიმშილობას წყვეტს, თუმცა ის შიმშილობის შეწყვეტასთან დაკავშირებით გარკვეულ პირობებს აყენებს. ექსპრეზიდენტის შესაბამისი გადაწყვეტილება საზოგადოებას მისმა უფლებადამცველმა, ნიკა გვარამიამ ცოტა ხნის წინ გააცნო.