პაატა შევარდნაძე სოციალურ ქსელში ემოციურ პოსტს აქვეყნებს.
“გელა ჩარკვიანს
ბატონი გელა, ჩემი შედარებით უფროსი თაობის ერთი უპირობო, ინტელექტუალური ლიდერი გახლდათ. ახლა, განსაკუთრებით ახლგაზრდებისთვის, საკმაოდ რთული წარმოსადგენია, ძველი მენტალიტეტის პირობებში, რას ნიშნავდა ყოფილიყავი შინაგანი თავისუფლების უალტერნატივო “სახე”, ჭეშმარიტი ინტელექტუალური და მორალური ლიდერი. ეს სასიცოცხლოდ უმნიშვნელოვანესი თვისება საოცრად გადამდები აღმოჩნდა მათთვის, ვინც ორმაგ სტანდარტებს ვერ ეგუებოდა და საკუთარი ცხოვრების კრედოს პატიოსნებას, პრინციპულობას, შეურიგებლობას და გონიერებას უკავშირებდა.
ბატონი გელა იმ კატეგორიის ადამიანთა ვიწრო წრეს მიეკუთვნებოდა, რომლისთვისაც სრულიად უცხო იყო საზოგადოების რაიმე ნიშნით დაყოფა. ის იყო ისეთი, როგორიც იყო: სიცოცხლით სავსე, აბსოლუტურად “დაცლილი” ე.წ. ანგარებისგან( ხშირად მიფიქრია, მას საერთოდ არ ესმოდა ამ სიტყვის მნიშვნელობა).
ჩვენი თაობის გამორჩეული ინტელექტუალური იდეოლოგი, ჭეშმარიტი სილაღის და კრეატიულობის განსახიერება, ნამდვილი ხელოვანი.
მავანისთვის, ასეთ ადამიანებს იოლად გადააქვს ცხოვრებისეული ტრაგედიები. ამ გაგებით, ბატონ გელაზე უფრო მგრძნობიერე პიროვნება იშვიათად თუ შემხვედრია! უბრალოდ, მან ბრწყინვალედ იცოდა, სად მთავრდებოდა პირადი და იწყებოდა საზოგადოებრივი. ესეც მისი ინდივიდის ერთ-ერთ უძლიერეს თვისებას წარმოადგენდა; ასეთები მხოლოდ “ამა ქვეყნისა” ძლიერები გახლავან.
როგორი უნდა იყოს ჭეშმარიტი, სამაგალითო ქართველი ( და არა მარტო ქართველი) – ბატონი გელას ცხოვრება და მოღვაწეობა ამ კითხვას სრულიად უნიკალურად განაზოგადებს!
მშვიდობით”