მესამე პრეზიდენტის, მიხეილ სააკაშვილის დედა, გიული ალასანია კათოლიკოს-პატრიარქს, ილია მეორეს შეხვდა.
ამის შესახებ გიული ალასანიამ “ტვ ფორმულასთან” განაცხადა და აღნიშნა, რომ შეხვედრის ინიციატორი თვითონ იყო.
“მე ვიცი, რომ მისთვის არაა სულერთი ჩემი შვილის მდგომარეობა და ჩემს შვილს ყოველთვის აქვს უწმინდესის იმედი. ძალიან ცოტა ხანი გაგრძელდა ეს შეხვედრა. იყო პატრიარქი, სამღვდელოებასთან ერთად, რომლებიც ზრუნავენ მასზე, ვილაპარაკეთ საერთოდ, ზოგადად, რომ საქართველოში როგორი ტრადიცია იყო, რომ სიცოცხლე ძალიან ფასობდა… ასეთი თემები”, – ამბობს გიული ალასანია.
მას შემდეგ, რაც მიხეილ სააკაშვილი დააკავეს, პატრიარქის მდივანმა, დეკანოზმა მიქაელ ბოტკოველმა ყოფილი პრეზიდენტი ციხეში ორჯერ მოინახულა. ორივე შეხვედრაზე ბოტკოველმა პატრიარქის მიმართვა გადასცა სააკაშვილს, რომ შიმშილობა შეეწყვიტა.
საქართველოს მესამე მიხეილ სააკაშვილი უკვე 44-ე დღეა, დაპატიმრებულია და შიმშილობს.