დღეს საქართველოს პარლამენტში გაიგზავნება მიმდინარე წლის ბიუჯეტის პროექტის ცვლილება. ძირითადი ნაწილი აქ იქნება ხარჯების გაზრდა ჯანდაცვის მიმართულებით. დაახლოებით 375 მილიონის ოდენობით, – ამის შესახებ ფინანსთა მინისტრმა, ლაშა ხუციშვილმა მთავრობის სხდომის შემდეგ განაცხადა.
მისი თქმით, მიმდინარე წლის ბიუჯეტის პროექტში ცვლილების უდიდესი ნაწილი სწორედ კოვიდთან დაკავშირებულ ხარჯებს მოიცავს.
„მიმდინარე წლის ბიუჯეტის პროექტის ცვლილებაში ძირითადი ნაწილი აქ იქნება ხარჯების გაზრდა ჯანდაცვის მიმართულებით, კოვიდის მკურნალობისთვის გაწეული ხარჯების დაფინანსებას, რომელიც მიმდინარე წელს იქნება დაფინანსებული. მნიშვნელოვანი საკითხი ამასთან მიმართებით არის ის, რომ შესაბამისად ხდება საშემოსავლო ნაწილის ბიუჯეტის ზრდა მიმდინარე წელს, რომელიც სრულად დაბალანსდება საგადასახადო შემოსავლების ზრდითა და სხვადასხვა სახის ეკონომიით, რაც იმას ნიშნავს, რომ მიმდინარე წელს საბიუჯეტო დეფიციტი არ იზრდება, პირიქით, მოლოდინი გვაქვს, რომ რამდენიმე მეათედი პროცენტული პუნქტით შემცირდება წლის ბოლოს, ხოლო ის ხარჯები, რაც იქნება გასაწევი უშუალოდ ჯანდაცვის მიმართულებით, სრულად იქნება დაფინანსებული“, – განაცხადა ლაშა ხუციშვილმა.