“თუ შს მინისტრი რაც უნდა იმას აკეთებდა, მაშინ სააკაშვილი თვითონ კი არ უნდა გადამდგარიყო, ჯერ სისხლის სამართლის პასუხისგებაში უნდა მიეცა დამნაშავეები,” – ეს განცხადება ექსპერტმა, მამუკა არეშიძემ “პალიტრანიუსის” ეთერში საუბრისას გააკეთა.
როგორც მან გადაცემა “360 გრადუსში” განაცხადა, შეუძლებელია სააკაშვილი საქმის კურსში არ ყოფილიყო ივანე მერაბიშვილი რას აკეთებდა.
“მისი პრეზიდენტობის პერიოდში აბსოლუტურად გამორიცხული იყო. დაუშვათ მოხდა ავად გახდა ვერ დაესწრო და ასე შემდეგ, მაშინ გამოდის, რომ სახელმწიფო არ გვქონია, მაშინ რა ააშენა სააკაშვილმა და მისმა გუნდმა. ამბობენ, რომ სახელმწიფო ააშენეს და შექმნეს ვერტიკალი, მაგრამ არ გვქონია ეს ვერტიკალი, თუ შინაგან საქმეთა მინისტრი რაც უნდა იმას აკეთებდა.
დაუშვათ ასეც მოხდა, რომ გააკეთა: პირველი, სახელმწიფო არ გვქონდა, მეორე, მაშინ თვითონ კი არ უნდა გადამდგარიყო, არამედ ჯერ სისხლის სამართლის პასუხისგებაში უნდა მიეცა დამნაშავეები და მერე გადაედგა ეს ნაბიჯი, თუ თვითონაც უარყოფითად აფასებს იმას, რაც 7 ნოემბერს მოხდა“, – განაცხადა არეშიძემ.
ასევე, როგორც არეშიძე განმარტავს, დღევანდელ სასამართლო პროცესზე მიხეილ სააკაშვილის გამოსვლის მესიჯი დასავლეთსა და მის მხარდამჭერებზე იყო გათვლილი.
“მიხეილ სააკაშვილმა ტემპორიტმი შეიცვალა, თუ რამე ყურადღება მისაქცევია ეს არის მისი გამოსვლის დრამატურგია დღეს. აბსოლუტურად განსხვავებული იყო, ცდილობდა ყოფილიყო მშვიდი და ნაკლებად ემოციური, რაც მისთვის არ არის დამახასიათებელი. მიხეილ სააკაშვილის მესიჯი დასავლეთზე და საზოგადოების იმ ნაწილზე იყო ორიენტირებული, რომელიც მხარს უჭერს, რომ ყოველგვარი ემოციისა და ექსესიური ემოციების გარეშე მისულიყო“, – განაცხადა არეშიძემ.