თბილისის საკრებულოს თავმჯდომარე გიორგი ტყემალაძე სოციალურ ქსელში პოსტს აქვეყნებს.
“დღეს, თბილისის მე-7 მოწვევის საკრებულოს პირველი სხდომა გაიმართა. ახალი საკრებულოს თავმჯდომარის თანამდებობაზე უმრავლესობამ ჩემი კანდიდატურა კიდევ ერთხელ წარადგინა და საკრებულოს თავმჯდომარედ ამირჩიეს. ასევე ავირჩიეთ თავმჯდომარის მოადგილეები, კომისიების და ფრაქციების თავმჯდომარეები. მადლობას ვუხდი კოლეგებს ნდობისა და მხარდაჭერისთვის! დარწმუნებული ვარ, რომ ერთობლივი ძალისხმევით, გუნდური მუშაობით, შევძლებთ ქალაქში დაწყებული და დაგეგმილი ყველა მნიშვნელოვანი პროექტის განხორციელებას. ახალი საკრებულოს საქმიანობა იქნება ისეთივე პროდუქტიული და წარმატებული, როგორიც იყო განვლილი ოთხი წლის განმავლობაში. მეტი კონსტრუქციულობა, პარტიული ინტერესების გვერდზე გადადება და დედაქალაქის კეთილდღეობაზე ზრუნვა – ეს გახლავთ ჩემი მთავარი თხოვნა და მოწოდება საკრებულოს წევრების მიმართ. ქალაქის ინტერესებიდან გამომდინარე, უმრავლესობისა და ოპოზიციის წარმომადგენელთა თანამშრომლობა საფუძველია საკრებულოს წარმატებული და ნაყოფიერი მუშაობისთვის!”-წერს ტყემალაძე.