გახარიას პარტიის მიერ ზუგდიდის საკრებულოს თავმჯდომარის პოსტზე საკუთარი კანდიდატურის დასახელება დღეს საკრებულოს სხდომაზე მოძრაობა „დროას“ წევრმა მარიამ სიჭინავამ გააპროტესტა.
„დროას“ წევრმა სხდომაზე პლაკატით ხელში – „ჩვენი თვალი გაქვთ!“ გახარიას პარტიის წარმომადგენლებს მიმართა.
მისი განცხადებით, პლაკატზე არსებული წარწერა – „ჩვენი თვალი გაქვთ!“, შეხსენებაა იმ პარტიის მიმართ, რომელსაც ზუგდიდის საკრებულოს თავმჯდომარეობაზე პრეტენზია აქვს. კერძოდ, სიჭინავას თქმით, აღნიშნულ პარტიას მაკო გომურისა და კობა ლეთოდიანის თვალი ვალად აქვთ.
ამასთან აღნიშნულ ბრალდებაზე საპასუხოდ გახარიას პარტიის ფრაქციის თავმჯდომარემ საკრებულოში, გიგა ფარულავამ განაცხადა, რომ ისინი გრძნობენ პასუხისმგებლობას და „დადგმულ შოუში მონაწილეობას არ მიიღებენ“.
ზუგდიდში დღეს საკრებულოს თავმჯდომარე უნდა აერჩიათ, თუმცა, კვორუმი ვერ შედგა და სხდომა ერთი კვირით გადაიდო.