ძალიან მიხარია, რომ „ნაციონალური მოძრაობის“ წარმომადგენელთა დიდი ნაწილიც კი უკვე ფაქტობრივად ემიჯნება იმ გეგმას, რომლის ჩაშლაზეც ასე დანანებით საუბრობს თქვენი ყოფილი ლიდერი, ბატონი მიხეილ სააკაშვილი, – ამის შესახებ პარლამენტის თავმჯდომარეობის კანდიდატმა ირაკლი კობახიძემ მე-9 მოწვევის პარლამენტის სხდომაზე „ნაციონალური მოძრაობის“ წევრის თინათინ ბოკუჩავას იმ შეკითხვის საპასუხოდ განაცხადა, რომელიც წინასაარჩევნოდ სახელმწიფო გადატრილების მცდელობასთან დაკავშირებით კობახიძისა და „ქართული ოცნების“ სხვა წარმომადგენლების მიერ გაკეთებულ განცხადებებს ეხებოდა.
„რაც შეეხება კითხვას წინასაარჩევნო საქმიანობაზე, თითქოს მე ვამართლებდი ხელისუფლების ყველა ქმედებას, მათ შორის, ძალადობას. მე გთხოვდით, რომ ასეთი ერთი ფაქტი მაინც დაასახელოთ. არც ერთი ფაქტი არ ყოფილა, სადაც მე ასეთი რამ გამეკეთებინოს. ამასთან დაკავშირებით მოგვიანებითაც შეგვიძლია ჩვენი დისკუსია განვავრცოთ. ყოველთვის ჩემი გამოსვლები იყო არგუმენტირებული და ეფუძნებოდა კონკრეტულ ფაქტებს“, – განაცხადა კობახიძემ.
ირაკლი კობახიძემ სრული პასუხისმგებლობა აიღო მის მიერ წინასაარჩევნო პერიოდში სახელმწიფო გადატრიალების მცდელობასთან დაკავშირებით გაკეთებულ განცხადებებზე.
„რაც შეეხება სახელმწიფო გადატრიალებასთან დაკავშირებულ ჩვენს გამოსვლებს, კიდევ ერთხელ, ამ შემთხვევაშიც მინდა მთელი პასუხისმგებლობა ავიღო თითოეულ იმ განცხადებაზე, რომელიც ამ მცდელობასთან დაკავშირებით კეთდებოდა წინასაარჩევნო პერიოდში. მე დღეს ძალიან მიხარია, რომ „ნაციონალური მოძრაობის“ წარმომადგენელთა დიდი ნაწილიც კი უკვე ფაქტობრივად ემიჯნება იმ გეგმას, რომელის ჩაშლაზეც ასე დანანებით საუბრობს თქვენი ყოფილი ლიდერი, ბატონი მიხეილ სააკაშვილი. თითოეულ განცხადებაზე, რომელიც დაკავშირებული იყო სახელმწიფო გადატრიალების მცდელობასთან, ჩვენ ვიღებთ პასუხისმგებლობას. ეს იყო ფაქტი, ამასთან დაკავშირებით ჩვემ გვქონდა ინფორმაცია და ამ ინფორმაციის წყაროებიც არაერთგზის დავაკონკრეტეთ. შესაბამისად, სრული პასუხისმგებლობით შეგვიძლია ჩვენ იგივე გავიმეოროთ“, – განაცხადა კობახიძემ.
პარლამენტის სხდომაზე, პარლამენტის თავმჯდომარის არჩევის წინ დეპუტატები სიტყვით გამოდიან. ოპონირება და ერთგვარი პოლიტიკური დებატები ”ქართული ოცნებისა” და ”ნაციონალური მოძრაობის” წევრებს შორის მიმდინარეობს.