ხელოვნების სახლის დირექტორი გიორგი კალანდია ტელეკომპანია “იმედის” ეთერში საქართველოს კულტურის მინისტრის, თეა წულუკიანის იმ განცხადებას გამოეხმაურა, რომლის თანახმად, ეროვნული მუზეუმიდან რამდენიმე ექსპონატი დაკარგულია.
კალანდიას ინფორმაციით, მინისტრის განცხადება გამქრალ ექსპონატებთან დაკავშირებით ფაქტებით არის გამყარებული. მისივე თქმით, ეროვნული მუზეუმის დღევანდელი ხელმძღვანელისგან ამის უარყოფა დღემდე არ მომხდარა.
“რასაც თეა წულუკიანი გამქრალ ექსპონატებზე ამბობს, ეს არის გამყარებული ფაქტებით. გარდა ამისა, ეროვნული მუზეუმის დღევანდელი ხელმძღვანელისგან ამის უარყოფა ჩვენ არ მოგვისმენია. ხმაურობენ სხვა თანამშრომლები, მაგრამ თავად ეროვნული მუზეუმის დირექტორს არასოდეს უთქვამს, რომ ეს ასე არაა. ეს მაფიქრებინებს იმას, რომ ეს ახლოსაა რეალობასთან. აქედან გამომდინარე, მე როგორც ვიცი, სულ მალე ეს ფაქტები კიდევ უფრო საჯარო გახდება. ის, რომ ხელოვნების მუზეუმი, ქვეყნის ყველაზე დიდი საგანძური, ამდენი ხნის განმავლობაში იყო დახურული, დამეთანხმეთ, რომ ამას გამოსწორება სჭირდება. ახლა დარწმუნებული ვარ, რომ ეს პრობლემა მოგვარდება“, – ამბობს გიორგი კალანდია.
ცნობისთვის, რამდენიმე დღის წინ საქართველოს კულტურის მინისტრმა, თეა წულუკიანმა საზოგადოებრივი მაუწყებლის ეთერში საუბრისას განაცხადა, რომ ეროვნული მუზეუმიდან რამდენიმე ექსპონატია გამქრალი.