ბათუმის საკრებულოს „ნაციონალური მოძრაობის“ წევრების მოთხოვნა, ქალაქის მერთან შეხვედრასთან დაკავშირებით, სამართალდამცველებთან ფიზიკურ დაპირისპირებაში გადაიზარდა.
თავდაპირველად, ოპოზიციის წარმომადგენლებმა მერის კაბინეტში შესვლა სცადეს, თუმცა სამართალდამცველებმა ამის საშუალება არ მისცეს, რის შემდეგაც მათ საკონფერენციო დარბაზი დაიკავეს. დაახლოებით ნახევარი საათის შემდეგ, სამართალდამცველებმა დეპუტატებს დარბაზის გათავისუფლება მოსთხოვეს, რაც ფიზიკურ დაპირისპირებაში გადაიზარდა.დეპუტატები გასვლას არ აპირებდნენ, სამართალდამცველებმა ისინი ძალით გაიყვანეს.
მერიის შენობის დერეფანში ხმაური ამ წუთებში ისევ გრძელდება. ადგილზე მივიდნენ „ნაციონალური მოძრაობის“ დეპუტატები უმაღლესი საბჭოდან. ისინი ჯერჯერობით შენობის დატოვებას არ აპირებენ.
რაც შეეხება ბათუმის მერს, არჩილ ჩიქოვანი ადგილზე არ გამოჩენილა, თუმცა მერიის პრესსამსახურმა ჩიქოვანის ვიდეომიმართვა გაავრცელა, სადაც არჩილ ჩიქოვანი აცხადებს, რომ ოპოზიციასთან შეხვედრა პრობლემა არ არის,
„შეხვედრა ოპოზიციასთან არ არის პრობლემა, თუმცა ოპოზიციის ნაწილი ცდილობს, ყოველდღიური შოუებით ხელი შეუშალოს მერიის საქმიანობას“,- განაცხადა არჩილ ჩიქოვანმა.