ეკონომიკის ექსპერტის, გიორგი ცუცქირიძის განცხადებით, ინფლაციის მაჩვენებელი, საქართველოს მსგავსად, თითქმის ყველა ქვეყანაშია გაზრდილი და ბოლო წლების ისტორიულ მაქსიმუმზეა. მისი თქმით, ეს პანდემიური შოკის პირდაპირი შედეგია.
„აშშ-ში, ბოლო 40 წლის განმავლობაში, ასეთი მაღალი ინფლაცია არ ყოფილა. იგივე შეიძლება ითქვას გერმანიასა და ბევრ სხვა ევროპულ ქვეყანაზე. ასევე, მეზობელ თურქეთზე. ეს კოვიდპანდემიური შოკის ზეგავლენის პირდაპირი შედეგია. ყველა პროგნოზით, წელს, გლობალურ ბაზრებზე, ეს ზეგავლენა შემცირებულია, რაც, ბუნებრივია, ჩვენზეც აისახება. გარდა ამისა, ჩვენთან ინფლაცია, ალბათ, საპროგნოზო მაჩვენებელზე დაყრდნობით, 3-4%-ის ფარგლებში იქნება. რასაც, პირველ რიგში, გლობალური ტენდენციების გარდა, უზრუნველყოფს ეროვნული ბანკის საკმაოდ მკაცრი მონეტარული პოლიტიკა და ბიუჯეტის დეფიციტის მკვეთრი შემცირება“, – აცხადებს გიორგი ცუცქირიძე.
ქვეყანაში ფასები მნიშვნელოვნად გაიზარდა. ყველაზე დიდი ზრდა დაფიქსირდა სურსათისა და ტრანსპორტის სექტორებში. ანალიზი ეყრდნობა გასული წლის მონაცემებს. ფასის ზრდა გლობალური ტენდენციით იყო განპირობებული. შესაბამისი უწყებების განმარტებით, ინფლაციური პროცესები მომდევნო თვეებში დასტაბილურდება.