ბათუმის მერის, არჩილ ჩიქოვანის განცხადებით, ოპოზიციას დესტრუქციული დღის წესრიგი აქვს და შუალედურ არჩევნებზე უცვლელი იქნება. მისივე შეფასებით, „ნაციონალური მოძრაობა“ და ექსპრემიერ გიორგი გახარიას პარტია, სხვა მუნიციპალიტეტების მსგავსად, ბათუმშიც საერთო სცენარით მოქმედებენ.
ბათუმის საკრებულოს შუალედური არჩევნები 2 აპრილს გაიმართება. „ქართულმა ოცნებამ“ მაჟორიტარობის კანდიდატად რამაზ ჯინჭარაძე დაასახელა. „ნაციონალური მოძრაობის“ კანდიდატი, სავარაუდოდ, ნუგზარ ფუტკარაძის შვილი იქნება. კანდიდატის დასახელებას აპირებს გახარიას პარტიაც.
„ჩვენ გვყავს ძალიან ღირსეული კანდიდატი. ბუნევრივია, როგორც საქმიანი რეპუტაციით, ასევე გამოცდილებით, პროფესიონალიზმით, ასევე მხარდაჭერის ნაწილში არანაირი პრობლემები არ იქნება. რაც შეეხება ოპოზიციას, არის მოლოდინი, რომ რასაც ყოველდღე აკეთებენ ისინი, კვლავ ორიენტირებული იქნებიან დესტრუქციაზე – საცირკო წარმოდგენები და ინსტიტუციების უგულებელყოფა“, – აცხადებს ჩიქოვანი.