„ნაციონალურმა მოძრაობამ“ პირადად მე დამიყენა ისნის ოლქში მაჟორიტარობის კანდიდატი და იქ დამთავრდა ჩვენი თანამშრომლობა, მორჩა და გათავდა, – ამის შესახებ „სტრატეგია აღმაშენებლის” ლიდერმა, გიორგი ვაშაძემ საქართველოს პირველი არხის გადაცემაში „დღის თემა“ განაცხადა.
„ჩვენ მათთან არანაირ განსაკუთრებულ კოორდინაციაში არ ვართ“, – განაცხადა ვაშაძემ.
ამ განცხადებით გიორგი ვაშაძემ გადაცემის წამყვანის შეკითხვას უპასუხა, რატომ გაემიჯნა „სტრატეგია აღმაშენებელი“ გიგი უგულავას წინადადებას, მცირე პარტიების „ნაციონალური მოძრაობის“ „ქოლგის ქვეშ“ გაერთიანების შესახებ და არის თუ არა გამიჯვნის მიზეზი ის, რომ ყველაზე მსხვილ პოზიციურ პარტიასთან თანამშრომლობამ „სტრატეგია აღმაშენებელს“ თავის დროზე შედეგი ვერ მოუტანა.
„არასწორი ინტერპრეტაცია იყო. მან თქვა, „ნაცმოძრაობის“ გარშემო ვინც არის, „ნაცმოძრაობის“ გარშემო დაჯგუფდეს და სხვებისგან კიდევ ცალკე მიზიდულობის ცენტრი შეიქმნასო. კიდევ ერთხელ ვამბობ, მე არც ამ დისკუსიაში არ მივყვები; გამოვრიცხავ, რომ „სტრატეგია აღმაშენებელი“ „ნაცმოძრაობასთან“ ერთად რამე წინასაარჩევნოში დაჯგუფდეს. იმიტომ, რომ ჩვენ გვინდა, საზოგადოებას ვაჩვენოთ თანმიმდევრული პოლიტიკა და არა არათანმიმდევრული. მეორე მნიშვნელოვანი საკითხია ის, რომ 2%-იანი ბარიერი უნდა მივიღოთ და სრულად პროპორციული სისტემა, რომლითაც შემდგომი, 2024 წლის საპარლამენტო არჩევნები ჩატარდება, თუ, არ გამოვრიცხავ, რიგგარეშე არჩევნები, ეს ხალხის ნებაზეა დამოკიდებული და ამას ვერავინ გააჩერებს, თუ ასეთი არჩევნები ჩატარდა. სწორედ ამიტომ არის ეს 2%-იანი ბარიერი და სრულად პროპორციული სისტემა, რომ აღარ იყოს საჭირო ხელოვნური კოალიციები და გაერთიანებები“, – განაცხადა ვაშაძემ.