„ქართული ოცნების“ ქალთა ორგანიზაციის დაფუძნებასთან დაკავშირებით, მმართველი პარტიის თავმჯდომარე ირაკლი კობახიძე რეგიონებში შეხვედრებს მართავს. პირველი შეხვედრა დღეს მცხეთაში გაიმართა. „ქართული ოცნების“ თავმჯდომარე ირაკლი კობახიძე, საპარლამენტო უმრავლესობის წევრები ნინო წილოსანი, ირმა ზავრადაშვილი, დიმიტრი ხუნდაძე, ეკონომიკის მინისტრის მოადგილე მარიამ ქვრივიშვილი მცხეთის ადგილობრივი ორგანიზაციის წევრ ქალებს შეხვდნენ.
შეხვედრაზე ისაუბრეს ქალთა ორგანიზაციის დაფუძნების ვადებზე, შეჯერდა პოზიციები დამფუძნებელი ყრილობის ჩატარებასთან დაკავშირებით.
შეხვედრას ესწრებოდა სახელმწიფო რწმუნებული მცხეთა-მთიანეთის მხარეში დავით ნოზაძე.
„გვინდა, რომ ეს ორგანიზაცია მაქსიმალურად აქტიური იყოს. მთავარი მიზანია ჩვენი პარტიის ქალი წევრების კარიერული წინსვლის და პროფესიული განვითარების ხელშეწყობა. საბოლოო ჯამში ეს უნდა აისახოს ხელისუფლებაში, მაღალ დონეზე ქალების წარმომადგენლობის გაზრდაზე და ზოგადად საზოგადოებაში ქალების ინტერესებისა და უფლებების უკეთ დაცვაზე“, – ამბობს კობახიძე.
დღესვე საპარლამენტო უმრავლესობის წევრები ანალოგიურ შეხვედრებს გორსა და ბორჯომში გამართავენ.