მას შემდეგ, რაც საქართველოში კორონავირუსი გავრცელდა, პირველი საუნივერსიტეტო კლინიკა ერთ-ერთი პირველი იყო, რომელიც კოვიდინფიცირებული პაციენტების მკურნალობის პროცესში ჩაერთო. პირველმა საუნივერსიტეტო კლინიკამ ათი ათასობით კოვიდპაციენტი მიიღო და ის თავიდანვე გამოირჩეოდა ერთ-ერთი ყველაზე დაბალი სიკვდილიანობის მაჩვენებლით.
პირველ საუნივერსიტეტო კლინიკაში უამრავმა პაციენტმა, მათ შორის ცნობილმა სახეებმა გაიარეს მკურნალობა და ისინი ყოველთვის მადლიერებას გამოხატავდნენ კლინიკის ხელმძღვანელის, ლევან რატიანის მიმართ. პაციენტები მუდმივად უსვამენ ხაზს რატიანის პროფესიონალიზმსა და კეთილსინდისიერებას. ლევან რატიანი კი თავის მხრივ, ყოველთვის გამოირჩეოდა განსაკუთრებული დამოკიდებულებით მისი პაციენტების მიმართ.
“ჯორჯიან თაიმსი” პირველი საუნივერსიტეტო კლინიკისა და მისი ხელმძღვანელის მიმართ ცნობილი ადამიანების დამოკიდებულებით დაინტერესდა. გამოცემა დაინტერესდა, როგორ აფასებენ ისინი კლინიკის მენეჯმენტს, მკურნალობის მეთოდებს და თავად ლევან რატიანის პროფესიონალიზმს.
ფოტოგრაფი გიორგი აბდალაძე, რომელმაც მკურნალობა საუნივერსიტეტო კლინიკაში გაიარა, ჩვენთან საკუთარ გამოცდილებაზე ისაუბრა. აბდალაძე ამბობს, რომ კლინიკის წარმომადგენლებისა და პირადად ლევან რატიანის თავდაუზოგავი მცდელობის შედეგად, ის მძიმე მდგომარეობიდან გამოვიდა და დაავადება დაძლია.
“ცხოვრებაში ყველაფერი მაქვს ნანახი ტყვეობაც, ციხეც, ომიც, მაგრამ ასეთი რამე არასოდეს მინახავს. ფაქტობრივად, ვიყავი მიცვალებული. დღეს უკეთესად ვარ, ვსუნთქავ, ძალა მაქვს და იმედი… ლევან რატიანი ჯადოქარია. ის სასწაულებს ახდენს,“ – ამბობს აბდალაძე და ადამიანებს მოუწოდებს გაუფრთხილდნენ საკუთარ ჯანმრთელობას და სამედიცინო პერსონალს. აბდალაძემ მედპერსონალის მიერ გაწეულ მძიმე შრომაზეც ისაუბრა.
“თქვენ ვერასოდეს წარმოიდგენთ, რა ხდება აქ, რეანიმაციის განყოფილებაში. აქ არ არსებობს შაბათი, კვირა დღესასწაული, დღე და ღამე… სამედიცინო პერსონალი მუდმივად ებრძვის სიკვდილს და სიცოცხლეს ჩუქნის ადამიანებს…“ – გვითხრა გიორგი აბდალაძემ.
ლევან რატიანსა და მის გუნდს დიდ მადლობას უხდის ტელეწამყვანი მაია ასათიანი და ის მედპერსონალის პროფესიონალიზმს უსვამს ხაზს.
“უღრმესი მადლობა ლევან რატიანსა და მისი კლინიკის გუნდს, მათ შეუძლებელი შეძლეს”- აცხადებს მაია ასათიანი.
კლინიკის ხელმძღვანელს თავდაუზოგავი შრომისთვის საჯარო მადლობას უხდის პარტია “საქართველოსთვის” წევრი ნათია მეზვრიშვილი, რომელმაც კორონავირუსი სწორედ პირველ საუნივერსიტეტო კლინიკაში დაამარცხა.
“ლევან რატიანს საჯაროდ მადლობა ვერასოდეს გადავუხადე იმ ზრუნვისთვის, რაც ჩემი როგორც პაციენტის მიმართ გამოავლინა. ახლა ვუხდი მადლობას მას და ვუხდი ყველა იმ ადამიანის სახელით, ვისი სიცოცხლის გადასარჩენადაც ის და მისი კოლეგები აგერ უკვე წელიწადნახევარია, 24/7-ზე იბრძვიან. ექიმების შესაძლებლობებიც ამოწურვადია,” – აცხადევს ნათია მეზვრიშვილი.
მადლიერ პოლიტიკოსებს შორისაა “ლეიბორისტული პარტიის” ლიდერი შალვა ნათელაშვილიც, რომელიც აცხადებს, რომ თოთხმეტდღიანი ბრძოლის შემდეგ, ექიმების დახმარებით კორონავირუსისგან გამოჯანმრთელდა. კოვიდისგან გამოჯანმრთელდა შალვა ნათელაშვილის მეუღლეც, ბელა ალანიაც, რომელიც ლევან რატიანის და მისი გუნდის მიმართ დიდ მადლიერებას გამოხატავს.
“მიუხედავად სიშორისა, გვერდიდან არ მშორდებოდნენ…. ოთო ექიმი გვახალისებდა, გურულ ისტორიებს გვიყვებოდა. აი, ასეთებს, ღიმილიან განწყობას რომ გვიქმნიდნენ. ერთ დღეს ჰაერის უკმარისობა მქონდა. ასეთ დროს უმწეო ხდები… შესცქერი სატურაციის აპარატს და მისი მაღლა-დაბლა აწევ-დაწევა ხდება სასიცოცხლო თემა. იმასაც უშვებ, რომ დილით შეიძლება ვერ გაიღვიძო… აქ ყველას ყველა უყვარს… არც პოლიტიკაა და არც ეკონომიკა წამყვანი თემა.
ფუსფუსა ექთნები გვიფრთხილდებიან. მზრუნველი, გასაოცარი, „ჩვენიანი“ ექიმები ჰყავს კლინიკას. კლინიკის დირექტორი ლევან რატიანი მარტო პროფესიონალი კი არ არის, რომელმაც იცის ყველა პაციენტის სახელი, გვარი და დღეში ორ-სამჯერ პირადად ეკონტაქტება თითოეულს. ის, უბრალოდ, სიყვარულით სავსე ადამიანია და სანამ საქართველოში ასეთები მეგულება, სიგლახეები ვერ მოგვერევა, ვერ დაგვჯაბნის!”- აცხადებს ნათელაშვილის მეუღლე.
პირველი საუნივერსიტეტო კლინიკის გენერალურ დირექტორს, ლევან რატიანს და ყველა ექიმს, რომელიც ჩართულია კორონავირუსის წინააღმდეგ ბრძოლაში საჯარო მადლობას უხდის მომღერალი მერაბ სეფაშვილი.
“მადლობა მინდა ვუთხრა ლევან რატიანს და მთელ მის გუნდს, რომელიც თავდაუზოგავად იბრძვის ყოველი ადამიანის გადასარჩენად ვინც სნეულდება ამ ვირუსით. სიტყვებით ვერ გამოხატავ, თუ რამხელა სიკეთეს აკეთებს ეს ხალხი თავისივე ჯანმრთელობის ხარჯზე. ამას ჰქვია ნამდვილ პროფესიონალთა გუნდი. მადლობა ლევან,” – აცხადებს მომღერალი
პირველ საუნივერსიტეტო კლინიკაში დაავადება დაამარცხა მსახიობმა მარიკა შალიკაშვილმაც, რომელმაც ლევან რატიანის მხრიდან გამოჩენილ დამოკიდებულებაზე საუბრობს და საკუთარი თვალით ნანახ რეალობას უზიარებს საზოგადოებას.
“ლევან რატიანი დამპირდა ნუ შეგეშინდება, თუ დაგემართა მოგხედავო, დამემართა და მომხედა აღარ ქვია ამას – თან გადამყვა. თვეების მანძილზე ჩემი ყოველი დილა პირველი საუნივერსიტეტო კლინიკით იწყებოდა, მაშინ სხვების ჯანმრთელობის მდგომარეობას ვაცხადებდი და სულ მაინტერესებდა, შიგნით რა ხდებოდა.
ლევან რატიანს დიდ პატივს ვცემდი და ვაფასებდი როგორც უკეთილეს, პროფესიონალ ექიმს, რომელიც სხვების სიცოცხლისთვის იბრძოდა. ახლა უკვე ყველაფერი ის რაც პირველ საუნივერსიტეტოში ხდება, ჩემი თვალით მაქვს ნანახი. ეს არის თავდადებული, საკუთარი სიცოცხლის რისკის ფასად სხვა ადამიანების გადარჩენისთვის მებრძოლი, ძალიან მაგარი, კეთილშობილი ადამიანების გუნდი. მიხარია რომ ასეთი ხალხი არსებობს და მათ რომ ვხედავ, მჯერა ყველაფერი კარგად იქნება,” – აცხადებს მარიკა შალიკაშვილი.
ემოციური მიმართვა აქვს ცნობილ მომღერალ ნოდიკო ტატიშვილსაც, სადაც ის კლინიკის დირექტორს, ლევან რატიანს მადლობას უხდის. მომღერალი აცხადებს, რომ ლევან რატიანმა მისი მშობლები სიკვდილისგან გადაარჩინა.
“არც ვიცი ისეთი მადლობა როგორ გადავუხადო ამ სასწაულ პიროვნებას და ექიმს, როგორსაც იმსახურებს. დედა და მამა ამ გენიოსმა კაცმა გადამირჩინა და ხელიდან გამოგლიჯა ვერაგ კოვიდს! რომ არა ლევან რატიანი, არ ვიცი ეს ყველაფერი როგორ დასრულდებოდა! ძეგლი ეკუთვნის და უდიდესი გაფრთხილება ასეთი უმაღლესი დონის პროფესიონალს თავისი სუპერ გუნდით, რომლებიც არაფერს იშურებენ პაციენტებისთვის!”- აცხადებს ნოდიკო ტატიშვილი.
მართალია, ტელეწამყვანმა ინგა გრიგოლიამ კორონავირუსი სახლის პირობებში დაამარცხა, მაგრამ მან კვლევები პირველ საუნივერსიტეტო კლინიკაში ჩაიტარა და გამოჩენილი ყურადღებისთვის ის კლინიკის დირექტორს განსაკუთრებულად უხდის მადლობას.
კიდევ უამრავი ადამიანია, რომელიც სხვადასხვა დაავადების დამარცხების გამო სწორედ პირველი საუნივერსიტეტო კლინიკის ხელმძღვანელს ემადლიერება და მის მიმართ განსაკუთრებული დამოკიდებულებით გამოირჩევიან.