ევროკავშირის ელჩი საქართველოში კარლ ჰარცელი და რეგიონული განვითარებისა და ინფრასტრუქტურის მინისტრის მოადგილე მზია გიორგობიანი კახეთის რეგიონს ეწვივნენ. ვიზიტი მანავის ციხეში დაიწყო, სადაც ელჩმა ევროკავშირის მიერ დაფინანსებული, ახლადრეაბილიტირებული გზა მოინახულა.
„კახეთში ჩემს ორდღიან ვიზიტს მანავის ციხიდან ვიწყებ. მოვინახულებ სხვადასხვა პროექტს, რომელსაც ჩვენ, რეგიონის განვითარების ხელშესაწყობად, ცენტრალურ და ადგილობრივ ხელისუფლებასთან, სამოქალაქო საზოგადოებასა და ბიზნესის წარმომადგენლებთან ერთად ვახორციელებთ“, – განაცხადა ევროკავშირის ელჩმა საქართველოში, კარლ ჰარცელმა ჟურნალისტებთან საუბრისას.
მისი თქმით, ეს არის ევროკავშირის იმ დიდი მიზნის ნაწილი, რომელიც ქვეყნის რეგიონების თანაბარ განვითარებას ითვალისწინებს.
„კერძოდ, ეს მიზანი გულისხმობს ქალაქებსა და სოფლებს შორის განსხვავების შემცირებას რეგიონებისთვის ისეთი შესაძლებლობების უზრუნველყოფის გზით, რომლებიც ხელს შეუწყობს მათ განვითარებას და სამუშაო ადგილების შექმნას, აგრეთვე მათ ბუნებრივი და კულტურული მემკვიდრეობის დაცვასა და მოვლაში დახმარებას. ხვალინდელი დღე გარემოს დაცვას მიეძღვნება. კერძოდ, ჩვენ მოვინახულებთ ბიოსფერულ რეზერვატს, რომელიც საქართველოს არაჩვეულებრივი ბუნების შესანარჩუნებლად და, ამავე დროს, ადამიანებისათვის ამ გარემოში მუშაობისა და განვითარების შესაძლებლობების უზრუნველსაყოფად შეიქმნა. ეს ჩემთვის ნამდვილად არაჩვეულებრივი და დაუვიწყარი ორი დღე იქნება“, – განაცხადა კარლ ჰარცელმა.
ორდღიანი ვიზიტის განმავლობაში, კარლ ჰარცელი საგარეჯოს, გურჯაანისა და სიღნაღის მუნიციპალიტეტებში სხვადასხვა პროექტს მოინახულებს, ასევე მცირე ბიზნესის წარმომადგენლებს, ფერმერებსა და ექსპორტიორებს შეხვდება, რათა იმ ინიციატივებს გაეცნოს, რომლებიც რეგიონს ეკონომიკურ, სოციალურ, კულტურულ და გარემოსდაცვით კეთილდღეობას უზრუნველყოფს.