მიხეილ სააკაშვილმა საქართველოს პროკურატურას აშშ-ის მოქმედი პრეზიდენტის, ჯო ბაიდენის დაკითხვა შესთავაზა. როგორც ყოფილმა პრეზიდენტმა სასამართლო დარბაზში სიტყვით გამოსვლისას აღნიშნა, ბაიდენი დაადასტურებს, რომ 7 ნოემბრის მოვლენები რუსეთის ჰიბრიდული ომის ნაწილი იყო და ჩვენებას სააკაშვილის სასარგებლოდ მისცემს.
„7 ნოემბერი იყო ჰიბრიდული ომის ნაწილი საქართველოს წინააღმდეგ. ამერიკის დღევანდელი პრეზიდენტი, ჯო ბაიდენი 7 ნოემბრის მერე გამოვიდა და თქვა: „ის, რაც თბილისში 7 ნოემბერს მოხდა რუსეთის მიერ დაგეგმილი პროვოკაცია იყო“. ჯო ბაიდენს გამოძახება არ გინდათ?“, – განაცხადა სააკაშვილმა.
თბილისის საქალაქო სასამართლოში 7 ნოემბრის საქმის განხილვა „ნაციონალური მოძრაობის“ აქციის ფონზე მიმდინარეობდა. მიხეილ სააკაშვილმა დარბაზში განაცხადა, რომ უვადო შიმშილობას იწყებს.
საქართველოს ყოფილი პრეზიდენტი 1-ელ ოქტომბერს დააკავეს.