სააკაშვილის ეს დამოკიდებულება მეტყველებს იმაზე, რომ მას არ აქვს სამართლებრივი საფუძველი, რომ თავი იმართლოს იმ მძიმე დანაშაულებში, რომელსაც მას ედავება სახელმწიფო ბრალდება. შესაბამისად, ის მიმართავს შოუს, სხვადასხვა ტიპის მანიპულაციებს, რომ ის თითქოსდა ისეთ დღეშია, რომ რაიმე სახის სამედიცინო მომსახურება არ მიეწოდება, – განაცხადა „ქრონიკასთან“ საპარლამენტო უმრავლესობის წევრმა ანრი ოხანაშვილმა. დეპუტატი გამოეხმაურა დღევანდელ სასამართლო პროცესზე ყოფილი პრეზიდენტის განცხადებებს, მათ შორის უვადო შიმშილობის დაწყების თაობაზე.
„სააკაშვილის ეს ქცევა მიმართულია იქითკენ, რომ მას არ აქვს თავის მართლების სამართლებრივი საფუძველი, ვინაიდან სახელმწიფო ბრალდებას აქვს შესაბამისი მტკიცებულებები, რომლებიც შესაბამისი სტანდარტით ადასტურებენ, მის მიერ შესაძლო დანაშაულის ჩადენას და მას სურს, რომ ეს მტკიცებულებები და რეალობა გადაფაროს გარკვეული მანიპულაციებით.
ეს [7ნოემბერი] იყო ძალიან მძიმე ფურცელი ჩვენი ქვეყნის ისტორიაში, როდესაც მძიმე დანაშაულების ჩადენა მოხდა დღისით, შუა ქუჩებში და შესაბამისად, ძალიან მძიმე კატეგორიების დანაშაულები ჩაიდინა მაშინდელმა ხელისუფლებამ. შესაბამისად, როცა არ აქვთ მათ არგუმენტი, რითი შეიძლება ახსნან ეს მძიმე დანაშაულები ტაქტიკურად პიარული ხრიკით ცდილობენ, რომ საკითხი გადაიტანონ სხვა თემაზე, რომ საზოგადოებას უთხრან, – მთავარი არ არის აქ ის, რომ მაშინდელმა ხელისუფლებამ და ხელმძღვანელმა პირებმა უმძიმესი დანაშაულები ჩაიდინეს, არამედ ის, რომ თურმე რაიმე ტიპის მომსახურება არ მიეწოდება მას. ესეც სპეკულაცია და ტყუილია. ჩვენი ინფორმაციით, ეს ადამიანი უზრუნველყოფილია ყველა იმ პირობით, რაც საჭიროა შესაბამისი პატიმრისთვის.
წარმოიდგინეთ სადამდე მივიდა „ნაცმოძრაობა“ და მათი ბელადი, სააკაშვილი, რომელიც ჯო ბაიდენს აბრალებს იმას, თითქოს ბაიდენმა გაამართლა მაშინდელი ხელისუფლების მიერ უმძიმესი დანაშაულის ჩადენა. აი, აქამდე მივიდა „ნაცმოძრაობის“ ბელადი. რაც შეეხება მის უვადო შიმშილობას, ჩვენ შესაბამისი უწყებები დაიცავენ ყველა პირის უფლებას, მათ შორის პატიმარი სააკაშვილის უფლებას, რომ მან მიიღოს ყველა ის მომსახურება, რომელიც საჭიროა ასევე სხვა პატიმრებისთვის, რაც გათვალისწინებულია შესაბამისი კანონმდებლობით. მისი უფლებები ისევე როგორც სხვა პატიმრის, თანაბრად იქნება დაცული“, – განაცხადა ოხანაშვილმა.