პირებს, რომლებსაც დაუდასტურდა COVID-19, მაგრამ არ აღენიშნებათ სიმპტომები, დონორობა შეუძლიათ COVID-19-ზე დადებითი ტესტირების დღიდან სულ მცირე 14 დღის შემდეგ, – ამის შესახებ ინფორმაციას დაავადებათა კონტროლისა და საზოგადოებრივი ჯანმრთელობის ეროვნული ცენტრი ავრცელებს.
მათივე ინფორმაციით, ჯანმრთელობის მსოფლიო ორგანიზაციის მონაცემებით, გლობალურად, სისხლის მარაგები 20%-30%-ით შემცირდა.
„როგორ მოიქცევით თუ გეტყვით, რომ სამი ადამიანის სიცოცხლის გადარჩენა შეგიძლიათ? ამისთვის, ალბათ, ბევრი გზა არსებობს. თუმცა, თუ სისხლის უანგარო დონორი გახდები, სულ რაღაც რამდენიმე წუთიანი პროცედურით მნიშვნელოვან წვლილს შეიტან უსაფრთხო სისხლის მარაგის შექმნაში და ამით რამდენიმე ადამიანის სიცოცხლის გადარჩენას და სიცოცხლის ხარისხის გაუმჯობესებას შეძლებ.
ჩვენს კითხვაზე სწორი პასუხი, ალბათ, უკვე იცი. თუკი, ჯანმრთელობა ამის შესაძლებლობას გაძლევს, გაიღე სისხლი, იმოქმედე სიცოცხლის გადასარჩენად.
დონაციის აუცილებლობა განსაკუთრებულად აქტუალურია დღეს, როდესაც მსოფლიო COVID-19-ის პანდემიამ მოიცვა. ჯანმრთელობის მსოფლიო ორგანიზაციის მონაცემებით, გლობალურად, სისხლის მარაგები 20%-30%-ით შემცირდა.
სწორედ ამიტომ, მნიშვნელოვანია ჯანმრთელმა ადამიანებმა განაგრძონ სისხლის ჩაბარება ქვეყანაში უსაფრთხო სისხლის მარაგის შესაქმნელად.
გახსოვდეთ: პირებს, რომლებსაც დაუდასტურდა COVID-19 და აქვთ დაავადების სიმპტომური ფორმა, დონორობა შეუძლიათ გამოჯანმრთელებიდან (ბოლო უსიმპტომო დღიდან) 14 დღის შემდეგ;
პირებს, რომლებსაც დაუდასტურდა COVID-19, მაგრამ არ აღენიშნებათ სიმპტომები, დონორობა შეუძლიათ COVID-19-ზე დადებითი ტესტირების დღიდან სულ მცირე 14 დღის შემდეგ;
დონორობა შესაძლებელია COVID 19-ის საწინააღმდეგო ვაქცინაციის დღიდან 14 დღის შემდეგ“, – ნათქვამია დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გავრცელებულ ინფორმაციაში.