ორი დღის წინ თბილისში, შარტავას ქუჩაზე 16 წლის გოგონას ცხედარი იპოვეს. მარიამის გვამი “ოლიმპიური ვარსკვლავის” ტერიტორიაზე, ორმოში იყო ჩაგდებული. რა გახდა გოგონას გარდაცვალების მიზეზი უცნობია. ჩვენს მიერ, მოპოვებული ინფორმაციით, 16 წლის მარიამს მიმდებარე ტერიტორიაზე მცხოვრებლები კარგად იცნობდნენ. ერთ-ერთი ადგილობრივის განცხადებით, გოგონა შემთხვევის ღამეს მშენებლობაზე ორ უცხო გოგოსთან ერთად მივიდა და მუშას სთხოვა მშენებლობაზე შეეშვა. ამის შემდეგ გოგონა გარდაცვლილი იპოვეს.
თბილისში გავრცელდა ინფორმაცია იმის თაობაზეც, რომ მარიამის სიკვდილი სექტას უკავშირდება, რასაც ამბები.გე-სთან საუბარში მისი მეგობარი მარიამ ბერაია უარყოფს.
– მარიამ, ბოლოს როდის ნახეთ თქვენი მეგობარი?
– შემთხვევის დღეს ვნახე 4 საათზე. ჩემთან იყო მოსული, ძალიან კარგ ხასიათზე იყო, უცნაური მისთვის არაფერი შემინიშნავს. საღამოს 9 საათზე მასწავლებელთან ვიყავი, დედამისმა დამირეკა და მითხრა შენთან ხომ არ არისო. 12 საათზეც რომ აღარ გამოჩნდა მისი ძებნა დავიწყეთ. დაახლოებით 12 საათი ვეძებდით და თხრილში ვიპოვეთ ჩაგდებული. მისი ძებნა 20 ნოემბერს დავიწყეთ, პოლიციაც იყო ჩართული, “ოლიმპიურის” ტერიტორიაზეც ეძებდნენ, მაგრამ ვერ იპოვეს. შემდეგ მე და ჩემმა მეგობრებმა მოვძებნეთ. უკან მხარეს იყო ჩავარდნილი თხრილში.
– ხშირად იკრიბებოდით ოლიმპიურის მშენებარე კორპუსში?
– არა, მაგრამ ახლოს არის ჩვენს სახლთან, მაღალი შენობაა, ყველაფერი ვიფიქრეთ იმ წამს და იქაც მოვძებნეთ.
– არსებობს ვერსია, რომ მარიამი ორ გოგონასთან ერთად შევიდა შენობაში, ამის შემდეგ ის ორი გოგო დაიკარგა და მარიამი გარდაცვლილი იპოვეს?
– ეს ძალიან დიდი სისულელეა. მუშას მე ვთხოვე იქ შესვლის ნებართვა. მარიამი არც სექტაში ყოფილა და ყველას ვთხოვ, დააბრალებენ მსგავს სისულელეს.
– გამორიცხავთ თავი მოეკლა?
– მას მტრები არ ჰყავდა. დაველოდოთ ექსპერტიზის პასუხს, სხვას ვერაფერს ვიტყვი.
ამბები.გე