პოლიტიკური განცხადებები არის სერიოზული, ქვეყნის ოფიციალური პოზიციის გამომხატველი განცხადებები. ეს მხოლოდ ჩემი არ არის, როგორც საგარეო საქმეთა საქმეთა სამინისტროს პოზიცია. ეს არის მთავრობის პოზიცია, რომელიც პრემიერ-მინისტრის მიერაა მხარდაჭერილი, – ამის შესახებ საქართველოს ვიცე-პრემიერმა, საგარეო საქმეთა მინისტრმა, დავით ზალკალიანმა მთავრობის სხდომის შემდეგ გამართულ ბრიფინგზე განაცხადა.
მან იმ აქტივობებზე ისაუბრა, რაც საქართველოს ხელისუფლებამ საერთაშორისო დონეზე უკრაინის მხარდასაჭერად განახორციელა. ვიცე-პრემიერმა კიდევ ერთხელ ხაზგასმით აღნიშნა, რომ უკრაინაში აგრესიის დაწყებამდეც, საქართველო საერთაშორისო თანამეგობრობასთან ერთად, მუდმივად მისი სოლიდარული იყო.
„საქართველო შეუერთდა ძალიან ბევრ დეკლარაციას, რეზოლუციას და უფრო მეტიც, საქართველო საერთაშორისო თანამეგობრობასთან, ევროპის საბჭოს წევრ ქვეყნებთან ერთად იყო, იმ ქვეყნებთან ერთად, ვინც ხმა მისცა რუსეთის ფედერაციისთვის წევრობის შეჩერების მექანიზმის დაწყებას. თქვენ კარგად მოგეხსენებათ, თუ რას ნიშნავს და არის თუ არა აღნიშნული ჩვენი ურყევი პოზიციისა და მხარდაჭერის გამოვლენა უკრაინის მიმართ?!
ასევე, ჩვენ ვართ თანასპონსორი, აშშ-ის რეზოლუციისა, რომელიც წარდგენილი იყო გაეროს უშიშროების საბჭოს წინაშე. ჩვენ კარგად ვიცოდით, რომ ამ რეზოლუციას რუსეთის ფედერაცია მკაცრად შეხვდებოდა და ასეც მოხდა. მან ვეტო დაადო, თუმცა აღნიშნულის მიუხედავად, ჩვენ თანასპონსორი ვიყავით.
საქართველო შეუერთდა ევროკავშირის უმწვავეს განცხადებებს. მოგიწოდებთ, ნახოთ ტექსტი! ეს საჯაროა და ნახოთ, რა შეფასებებია იქ გაკეთებული. ეს არის ჩვენი ძალიან მყარი პოზიცია, ეს მარტივი არ არის! პოლიტიკური განცხადებები არის სერიოზული, ქვეყნის ოფიციალური პოზიციის გამომხატველი განცხადებები. ეს მხოლოდ ჩემი არ არის, როგორც საგარეო საქმეთა საქმეთა სამინისტროს პოზიცია. ეს არის მთავრობის პოზიცია, რომელიც პრემიერ-მინისტრის მიერაა მხარდაჭერილი“, – განაცხადა ზალკალიანმა.