“რუსეთის სამხედრო აგრესია საქართველოს წინააღმდეგ ყველასთვის გამოსაფხიზლებელი სიგნალი უნდა ყოფილიყო”

რუსეთის სრულმასშტაბიანი სამხედრო აგრესია ჩემი ქვეყნის წინააღმდეგ ყველასათვის გამოსაფხიზლებელი სიგნალი უნდა ყოფილიყო, მაგრამ საბოლოოდ, მაინც ვერ იქნა შესაძლებელი, თავიდან აგვერიდებინა ანალოგიური სცენარი, რომელიც რამდენიმე წლისთავზე უკრაინაში განვითარდა. გეტყვით, რომ ჩვენ საქართველოში ნამდვილად ვიცით, რას ნიშნავს შემზარავი ომი, – ამის შესახებ გაერო-სთან საქართველოს მუდმივმა წარმომადგენელმა, კახა იმნაძემ 28 თებერვალს გაერო-ს გენერალური ასამბლეის მე-11 საგანგებო სპეციალურ სესიაზე სიტყვით გამოსვლისას განაცხადა.

მისივე თქმით, საქართველო მოუწოდებს რუსეთის ფედერაციას, დაუყოვნებლივ შეაჩეროს სამხედრო მოქმედებები და გაიყვანოს შეიარაღებული ძალები უკრაინის ტერიტორიიდან.

„ძალების გამოყენებით ტერიტორიების დაუფლება ან ამ მიზნით მუქარა არის არაკანონიერი და დაუშვებელი. საქართველო მოუწოდებს რუსეთის ფედერაციას, დაუყოვნებლივ შეაჩეროს სამხედრო მოქმედებები და გაიყვანოს შეიარაღებული ძალები უკრაინის ტერიტორიიდან; უფლება მისცეს ყველა საერთაშორისო ჰუმანიტარულ და ადამიანის უფლებათა მექანიზმებს, დაუყოვნებლივი წვდომა ჰქონდეთ უკრაინის მთელ ტერიტორიაზე; შეცვალოს გადაწყვეტილებები უკრაინის განუყოფელი ნაწილების – დონეცკის, ლუგანსკისა და ყირიმის რეგიონების მიმართ და ანალოგიური გააკეთოს საქართველოსთან მიმართებითაც – გაიყვანოს შეიარაღებული ძალები, დაუშვას ჰუმანიტარული წვდომა, უკუაგდოს გადაწყვეტილება საქართველოს ოკუპირებული ტერიტორიების მიმართ“, – განაცხადა იმნაძემ.