სტატისტიკის მიხედვით რუსეთის მოქალაქეების რაოდენობა მსგავსია 2020 წლის, პანდემიამდე, მონაცემებისა, ასე რომ, საუბარი იმაზე, რომ დიდი რაოდენობით რუსეთის მოქალაქე ჩამოდის და ეს რაიმე რისკების შემცველია, ასე არ არის,- ამის შესახებ ეკონომიკის მინისტრმა, ლევან დავითაშვილმა მთავრობის სხდომის დასრულების შემდგომ გამართულ ბრიფინგზე განაცხადა.
მისივე თქმით, შინაგან საქმეთა სამინისტრო მალე საზოგადოებას სრულ სტატისტიკას გააცნობს.
„რუსეთის მოქალაქეების საქართველოში ვიზიტის სტატისტიკა შემდეგია – ზუსტი რიცხვები არ მახსოვს, მაგრამ შინაგან საქმეთა სამინისტროს ექნება უფრო დეტალური ინფორმაცია, რომელსაც საზოგადოებას გააცნობს. ჩვენ ამის შესახებ ვისაუბრეთ მთავრობის სხდომაზე, შინაგან საქმეთა მინისტრმა გაგვაცნო სტატისტიკა, მას ახლო მომავალში ექნება საჯარო გამოსვლა საპარლამენტო ფორმატში და აქაც გააკეთებს დეტალურ ანგარიშს ამ საკითხებზე. ეს ინფორმაცია დასამალი არ არის, პირიქით, საინტერესოა. საზოგადოებაში დავინახეთ, რომ ძალიან ემოციურადაა ეს საკითხი აღქმული, რაც აბსოლუტურად გვესმის, ამიტომ მეტი ზუსტი ინფორმაციაა მისაწოდებელი. რიცხვებით, თუ არ ვცდები, არის დაახლოებით 20-25 000 ადამიანი. ეს არის დაახლოებით ის რანგი, რაც იყო 2020 წელს, პანდემიამდე, ასე რომ ამ რიცხვების მიხედვით საუბარი იმაზე, რომ დიდი რაოდენობით რუსეთის მოქალაქე ჩამოდის და ეს რაიმე რისკების შემცველია, ეს ასე არ არის“,- განაცხადა ლევან დავითაშვილმა.