ბადრი ჯაფარიძე, შუალედურ არჩევნებში დეპუტატობის კანდიდატი აღარ იქნება. ის პარლამენტში მეორედ დასაბრუნებლად აღარ იბრძოლებს. მიზეზად „ლელოს“ ლიდერი, უკრაინაში მიმდინარე პროცესებს ასახელებს და ამბობს, რომ ახლა წინასაარჩევნო სამზადისის დრო არ არის. ჯაფარიძე მმართველ გუნდს, ასევე არჩევნების გადადებისკენ მოუწოდებს.
„საარჩევნო კამპანიის წარმოებისთვის აბსოლუტურად უადგილო დრო არის და ეს გადაწყვეტილება მივიღე იმ პარტნიორებთან საუბრის შემდეგ, რომლებმაც მხარდაჭერის მზადყოფნა გამოხატეს. ყველა მათგანს შევხვდი. მათ თქვეს, რომ ახლა კამპანიის წარმოება უბრალოდ უზნეობა და უპასუხისმგებლობაა. ეს ამომრჩევლების სიტყვებია, რომლებიც მხარს მიჭერდნენ და ახლაც მიჭერენ. რა თქმა უნდა, შანსები იყო ძალიან დიდი, მაგრამ თუ არ გავითვალისწინებთ ამომრჩევლის განწყობას, იმას თუ როგორ განიხილავს ის შექმნილ ვითარებას, მაშინ ცხადია, რომ ამომრჩეველთან კონტაქტი იკარგება“, – განაცხადა ჯაფარიძემ.